Astanaǵa «Uly dala azamattary» avtosherýi keledi

ASTANA. QazAqparat - Uly Otan soǵysy bastalǵan kúni «Uly dala azamattary» respýblıkalyq avtosherýin ótkizýge arnalǵan konferentsııa uıymdastyryldy. Shara elimizdiń Táýelsizdiginiń 25 jyldyǵyn atap ótýge jáne UOS jyldary alǵashqy áskerı quramalardyń qurylǵanyna 75 jyl tolýyna oraılastyrylǵan, dep habarlaıdy elorda ákimdiginiń baspasóz qyzmeti.

Atalǵan keń aýqymdy sharanyń maqsaty memlekettilik pen patrıottyq sezimdi, halyq birligin, jalpyulttyq qundylyqtardy nyǵaıtýǵa septigin tıgizý jáne qazaqstandyqtardy «Máńgilik el» ıdeıasyn ustanýǵa, «Nurly jol» baǵdarlamasyn júzege asyrýǵa shaqyrý, sondaı-aq, Uly Otan soǵysy jyldaryndaǵy qazaqstandyqtardyń erligi men batyldyǵyn nasıhattaý bolyp tabylady.

«Biz Bishkek arqyly júremiz, Taraz, Shymkent, Túrkistan, Qyzylorda, Qazalyda mindetti túrde bolamyz, Aqtóbege soǵamyz - jaqynda oryn alǵan oqıǵalardyń saldarynan Otanymyzdy qorǵap, qaza tapqan 312-shi dıvızııa - ulttyq gvardııaǵa taǵzym etemiz, sodan keıin dıvızııa qurylǵan Petropavlǵa baramyz», - deıdi Astanadaǵy «Generaldar keńesi» RQB ókili, general-maıor Marat Mardenov baspasóz máslıhaty barysynda.

Avtosherýge qatysýshylar 8 shildede elordaǵa at basyn tireıdi. Saltanatty shara «Otan qorǵaýshylar» monýmentiniń aldyndaǵy alańda ótedi. 1941 jyly bul jerde Qyzyl Áskerdiń dalalyq oqý ortalyǵy bolǵan. Alańda Qazaqstan halqy Assambleıasynyń, qoǵam, qalalyq jastar uıymdarynyń, úkimettik emes uıymdardyń ókilderiniń jáne t.b. qatysýymen mıtıng ótkiziledi.