Astanaǵa «Saryarqa» gaz qubyryn salý jobasynyń qujaty ázirlenýde

ASTANA. QazAqparat - Astanaǵa gaz qubyry Qyzylordadan tartylýy múmkin. Bul týraly QazAqparat tilshisiniń saýalyna QR Energetıka mınıstrliginiń baspasóz qyzmetinen habarlandy.

«Gaz jáne gazben jabdyqtaý salasyndaǵy ulttyq operator «QazTransGaz» AQ Astana qalasyn jáne gaz qubyrynyń boıynda ornalasqan eldi mekenderdi gazdandyrý úshin tıisti jumystardy atqarýda. Osy oraıda «Beıneý-Bozoı-Shymkent» magıstraldy gaz qubyrynan Kyzylorda - Jezqazǵan - Qaraǵandy - Temirtaý - Astana baǵyty turǵysynda «Saryarqa» gaz qubyryn salý jobasy boıynsha Tehnıkalyq ekonomıkalyq negizdemeni (TEN) ázirlep jatyr»,-dep atap ótilgen mınıstrlik málimetinde.

Atap aıtqanda, negizdemeni ázirleý bıyldyń sońyna deıin aıaqtalady dep josparlanýda jáne onyń nátıjesi boıynsha osy TEN úshin beriletin «Memlekettik saraptama» RMK-nyń qorytyndysy boıynsha bul Jobany odan ári iske asyrý týraly sheshim qabyldanatyn bolady.

Esterińizge sala keteıik, Memleket basshysy Nursultan Nazarbaev osyǵan deıin Astanaǵa ǵaz qubyryn tartýdy tapsyrǵan bolatyn. Bul rette elordany gazben qamtamasyz etý boıynsha túrli jobalar qaralyp jatqandyǵy habarlanǵan edi.

Sonymen qatar buǵan deıin «Tobyl-Kókshetaý-Astana» soltústik gaz qubyryn salý sharalary qarastyrylǵan bolatyn.