Astanaǵa omıkron shtamy tirkelgen elderden bir aıda 2247 jolaýshy keldi – bas sanıtar

NUR-SULTAN. QazAqparat – Elordaǵa bir aıdyń ishinde koronavırýstyń jańa shtamy omıkron tirkelgen elderden 2 myńnan astam jolaýshy keldi. Bul týraly Nur-Sultan qalasynyń bas memlekettik sanıtar dárigeri Sarhat Beısenova málim etti, dep habarlaıdy QazAqparat tilshisi.

«Elordada shetelden kelgen azamattar arasynda profılaktıkalyq jumys jalǵasyp jatyr. 12 jeltoqsan (2021 jyl) men 12 qańtar (2022 jyl) aralyǵynda qalaǵa «omıkron» shtamy tirkelgen elderden 2247 jolaýshy keldi. Onyń bári bir aptaǵa oqshaýlanýǵa jiberilip, mamandardyń baqylaýynda. Atalǵan jolaýshylardan KVI tabylmady, degenmen klınıkalyq sımptomnan keıin bir jolaýshydan omıkron shtamy anyqtaldy. Dálirek aıtqanda, jolaýshy qalaǵa 16 jeltoqsan kúni keldi, ol kezde PTR testiniń nátıjesi teris bolǵan. Ýaqyt óte kele, ıaǵnı 22 jeltoqsan kúni patsıent medıtsınalyq kómekke júginedi. Tekserý nátıjesinde odan omıkron shtamy anyqtaldy», - dedi S. Beısenova ákimdikte ótken onlaın brıfıngte.

Bas sanıtar dárigerdiń málimdeýinshe, patsıent revaktsınatsııadan ótken, sondyqtan da indettiń jańa shtamyna jeńil tótep bire bildi.

«Omıkron shtamy tez tarap jatyr. Búginde álemniń 126 elinde tirkelip otyr. Atalǵan indetten saqtanýdyń birden bir amaly - karantın talaptaryn saqtaý jáne vaktsına alý. Vaktsına alǵan jaǵdaıda qaıta vaktsına alýdy da umytpaǵan jón», - deıdi ol.