Astanaǵa kelgen «Ál-Jazıra» arnasynyń jýrnalısi Qatardaǵy jaǵdaı týraly aıtyp berdi

ASTANA. QazAqparat - Qatardan kelgen Djeın Datton Astanadaǵy XIV Eýrazııalyq medıa forýmnyń keshki sessııasynda moderator boldy. Sóz basynda «Ál-Jazıra» arnasynyń jýrnalısi arab elderiniń sanktsııasyna ushyraǵan óz eliniń jaǵdaıy týraly baıandap berdi,  dep habarlaıdy QazAqparat tilshisi.

«Myna jaqqa kelý úshin jer sharyn aınalýǵa týra keldi. Negizi, buryn Qatardan aldymen Abý-Dabı qalasyna, odan keıin birden Astanaǵa ushatynbyz. Qazir Saýd Arabııasy, Birikken Arab Ámirlikteri, Mysyr sııaqty arab memleketteri áýe keńistigimen de ushýǵa tyıym saldy. Olar shekarany da, joldy tolyǵymen jaýyp tastady», - deıdi Djeın Datton.

Onyń aıtýynsha, kórshi arab elderiniń narazylyǵy bir kúnde týyndaǵan joq. Sońǵy birneshe jyl boıy teketires sezilip keldi. «Búgin Qatardyń kórshileri óz aryz-shaǵymdaryn qaǵaz júzinde jiberdi. Shyn máninde, olar Qatardy qaıtadan ózderine qaratyp, qolbalasy retinde ustaǵysy keledi», - dep atap kórsetti jýrnalıst.  

Aıta keteıik, 5 maýsymda Saýd Arabııasy, Bahreın, Birikken Arab Ámirlikteri, Mysyr, Iemen, Lıvııa men Maldıv araldary Qatarmen dıplomatııalyq baılanystardy toqtatatynyn málimdedi. Arab elderi atalǵan memleketti ekstremıstik toptarǵa qoldaý jasaıdy dep kinálap otyr. Osy jaǵdaıǵa baılanysty Qazaqstan da óz ustanymyn bildirgen bolatyn.