Astanaǵa keletin kógildir otynnyń 1 tekshe metri qansha teńge bolady

ASTANA. QazAqparat - Búgin Úkimet otyrysynan keıin BAQ ókilderiniń saýalyna jaýap bergen QR Energetıka mınıstri Qanat Bozymbaev «Saryarqa» gaz qubyrymen keletin kógildir otynnyń boljamdy baǵasyn atady, dep habarlaıdy QazAqparat.

«Bizde tıisinshe tehnıkalyq-ekonomıkalyq negizdeme bar. Gazdyń baǵasy shamamen 47 teńge bolýy múmkin. Bizdiń jaǵdaıymyzda tabıǵı gaz arzan bolmaıdy. Óıtkeni, ózderińizde bilesizder, kómir Qazaqstanda, jalpy álemde eń arzan otyn sanalady. Biraq, qys aılarynda kómir jaǵýdyń atmosfera aýasyna qandaı zııan keltiretin kórip júrsizder», - dep jaýap berdi Qanat Bozymbaev.

Onyń aıtýynsha, «Saryarqa» gaz qubyrynyń qurylysymen qatar Qaraǵandy, Aqmola oblystarynyń jáne Astana qalasynyń ákimdigi jergilikti gaz jelilerin salý jumystaryn júrgizýi tıis.

«Bıylǵy jyldyń birinshi kezeńinde olar gaz taratý jelilerin salý máselesin qarastyrýlary tıis. Máselen, elordanyń bir shaǵyn aýdanyna nemese sý qaınatatyn qondyrǵylarǵa gaz jelilerin tartý jumystaryn kelesi jyldyń sońyna deıin aıaqtaýlary qajet», - dedi ol.

Mınıstrdiń aıtýynsha, «Saryarqa» gaz qubyryn Kókshetaý, Petropavlǵa qaraı sozý bolashaqtyń enshisine qalady. Jalpy magıstraldy gaz qubyryn Astanaǵa deıin tartýǵa 267 mlrd teńge qarajat jumsalady. Jobalyq-smetalyq qujattamasy mamyr aıynyń sońynda daıyn bolady. Al maýsym aıynyń basynda memlekettik saraptama engiziledi.