Astanaǵa qazaqstandyq ǵaryshkerdiń ǵarysh saparynyń jádigerleri jetkizildi
Máskeý mańyndaǵy Korolev qalasynan arnaıy avtofýrgonmen jerge qonatyn apparattyń maketi jáne qazaqstandyq ǵaryshker Aıdyn Aıymbetovtiń skafandr maketi ákelindi, dep habarlady agenttikke «Qazaqstan Ǵarysh Sapary» AQ-dan.
«Maketter A. Aıymbetovtiń ushyrylymy kezinde paıdalanylǵan, alaıda tek eksponattaý úshin daıyndalǵan skafandr men kádimgi jerge qonatyn apparatty qamtıdy. Osylaısha, Roskosmos ǵaryshker A.Aıymbetovtiń HǴS-qa ushýy týraly kelisimshart boıynsha óziniń mindettemelerin oryndaýdy aıaqtaıdy», - dep atap ótti Qazaqstandaǵy Roskosmos ókili Anatolıı Krasnıkov.
«Aıdyn Aıymbetovtiń ǵaryshqa ushyrylymy týraly kelisimshartty tolyq aıaqtaý úshin reseı tarapynan ǵaryshta júrgizilgen ǵylymı-tehnıkalyq eksperımentter týraly bekitilgen esepti kútip otyrmyz», - dedi Qazǵarysh basqarmasynyń bastyǵy Gúljan Smaıylova.
Apparat pen Aıymbetovtiń skafandrynyń maketteri Ulttyq ǵarysh ortalyǵynda saqtaýly, ol aldaǵy ýaqytta salynatyn qazaqstandyq jáne álemdik ǵaryshkerlik tarıhy murajaıyna qoıylady.