Astanaǵa irgeles 2 aýdanda qatty turmystyq qaldyqtarǵa arnalǵan polıgon salynady
«Bıyl Astanaǵa irgeles Aqmola oblysynyń Tselınograd jáne Arshaly aýdandarynda 422 sanktsııalanbaǵan qoqys úıindileri anyqtaldy. Olardyń 387-si búgingi tańda kádege jaratyldy. Bul 89 paıyzdy quraıdy. Qalǵan 35 polıgondy joıý kelesi jylǵa josparlanǵan. Ruqsatsyz polıgondardyń paıda bolýyna ekologııalyq zańnamany saqtamaýdyń birqatar faktorlary áser etedi. Óńirlerde qaldyqtardy basqarý boıynsha tıisti ınfraqurylym joq, polıgondar sanıtarlyq jáne ekologııalyq normalarǵa sáıkes kelmeıdi. Búgingi tańda Aqmola oblysynyń astanalyq aýmaǵynda ekologııalyq normalar men sanıtarlyq talaptarǵa sáıkes polıgondar joq. Osy máseleni sheshý úshin «Aqmola oblysynyń ekologııalyq problemalaryn keshendi sheshý jónindegi» jol kartasy ázirlendi. Jol kartasy aıasynda elordaǵa irgeles Tselınograd, Arshaly aýdandarynda qatty turmystyq qaldyqtarǵa arnalǵan eki polıgon salý josparlanǵan jáne osy jyly tehnıkalyq-ekonomıkalyq negizdeme ázirlengen», - dedi Úkimet basshysy jaýabynda.
Onyń atap ótýinshe, atalǵan is-sharalardy odan ári iske asyrý maqsatynda 2023 jyldyń birinshi jartyjyldyǵynda ekologııalyq jáne memlekettik saraptamadan ótkizý, odan ári ekinshi jartyjyldyqta jobalaý-smetalyq qujattamany ázirleý josparlanǵan. Bul jobalardy iske asyrý 2024 jylǵa kózdelip otyr.
«Jobalardy aıaqtaý qorytyndysy boıynsha ruqsat etilmegen qoqys úıindileriniń sany azaıady dep kútilýde. Joǵaryda aıtylǵanmen qatar, Ekologııa, geologııa jáne tabıǵı resýrstar mınıstrligi jańa Ekologııalyq kodeks aıasynda qaýipti qaldyqtardy qaıta óńdeýmen jáne kádege jaratýmen aınalysatyn kásiporyndarǵa lıtsenzııalar berý boıynsha sharalar qoldandy, qoqys tasıtyn kásiporyndardyń tizbesin jasady jáne qaldyqtarmen jumys isteý jónindegi talaptardy buzǵany úshin aıyppuldardy ósirdi», - dedi Álıhan Smaıylov.