Astanaǵa IFSWF dırektory Dankan Bonfıld keldi

ASTANA. QazAqparat - Halyqaralyq sýverendi ál-aýqat qorlary forýmynyń (IFSWF) bas atqarýshy dırektory Dankan Bonfıld Astanaǵa kelip, 2017 jyldyń 5-7 qyrkúıeginde ótetin IFSWF-tiń jyldyq otyrysyna daıyndyq jumystarymen tanysty. Dankan Bonfıld «Samuryq-Qazyna» AQ basqarma tóraǵasy Ómirzaq Shókeevpen jáne qordyń ózge top-menedjerlerimen kezdesti, dep habarlaıdy qordyń baspasóz qyzmeti.

Qor 2014 jylǵy aqpannan beri Halyqaralyq sýverendi ál-aýqat qorlarynyń múshesi bolyp tabylady.

Qordyń top-menedjerleri IFSWF basshysymen forýmnyń jyldyq otyrysyn talqylady, bul jolǵy basty taqyryp - «Jańa naryqtardy zertteý». Sonymen qatar, forým aıasynda ashyq sessııa ótkizilip, onda Qazaqstannyń ınvestıtsııalyq múmkindikteri, Qordyń jekeshelendirý baǵdarlamasy, «Bir beldeý - bir jol» bastamasy jáne t.b. talqylanady.   

«Samuryq-Qazynanyń» sýverendi qorlar forýmyna músheligi jáne jyldyq otyrystyń Astanada ótýi bizge zor jaýapkershilik júktep otyr, - dep atap ótti Ó.Shókeev, D.Bonfıldpen kezdesýde - IFSWF óz qyzmeti aıasynda ashyq jáne turaqty ınvestıtsııalyq ortany damytý men qoldaýǵa yqpal etip keledi, bul Qordyń elge ınvestıtsııa tartý jáne korporatıvtik basqarý deńgeıin kóterý mindetterimen úndesip jatyr. Biz sýverendi qorlardaǵy áripesterimizdiń nazaryn jekeshelendirý baǵdarlamasyna aýdarǵymyz keledi, qazirgi ýaqytta Qazaqstanǵa ınvestıtsııa salýǵa óte yńǵaıly jaǵdaı jasalyp otyr».

Halyqaralyq sýverendi ál-aýqat qorlarynyń forýmy tórt maqsatty ustanady: 1 - jahandyq qarjy júıesiniń turaqtylyǵyn jáne kapıtal men ınvestıtsııanyń erkin aǵysyn qamtamasyz etýge kómektesý; 2 - ınvestıtsııa salynǵan barlyq elderdegi aqparatty ashyq ustaý talabyna qoldanylatyn normatıvterdi saqtaý; 3 - ekonomıkalyq jáne qarjylyq táýekelder men paıda negizinde ınvestıtsııa jasaý; 4 - operatsııalyq baqylaýdy, táýekelderdi basqarý men eseptilikti qamtamasyz etetin ashyq ta senimdi basqarý qurylymyn jasaý.  

«Samuryq-Qazyna» AQ, 2015 jyly Mılanda ótken halyqaralyq sýverendi ál-aýqat qorlary forýmynda, daýys berý nátıjesimen, IFSWF-tiń jyldyq otyrysyn 2017 jyly Qazaqstanda ótkizý quqyna ıe bolǵan edi.

Astanadaǵy forýmǵa jıyntyq aktıvi 3,5 trln. AQSh dollary bolatyn 30 iri sýverendi qor qatysady.    IFSWF 2009 jyly Halyqaralyq valıýta qorynyń aıasynda qurylǵan bolatyn.