Astanaǵa álemniń eń myqty grossmeısterleri keldi – FIDE prezıdenti

<p>ASTANA. KAZINFORM &ndash; Astanada bastaý alǵan komandalyq álem chempıonatynda 39 komandanyń quramynda álemniń 315 úzdik shahmatshysy júldege talasady. FIDE prezıdenti Arkadıı Dvorkovıch jańa formattaǵy jarys qazirdiń ózinde shahmatshylar bylaı tursyn, kóptegen kórermenge unap qalǵanyn atap ótti.</p>

«Búgin biz rapıd jáne blıts boıynsha komandalyq álem chempıonatyn ashyp otyrmyz. Chempıon ataǵyn alý úshin Astanaǵa álemniń eń myqty grossmeısterleri, sonyń ishinde álemdik reıtıngtegi birinshi nómirli kil myqtylar, qazirgi álem chempıondary keldi. Bul kúnderi biz kóptegen qyzyqty oıyn men tartysty kezdesýdiń kýási bolatynymyzǵa senimdimin! Biz bul eldiń basshylyǵyna, Qazaqstan shahmat federatsııasyna jáne Freedom Holding Corp. Korporatsııasy basshylyǵyna Qazaqstanda jáne álemde shahmatty damytýǵa baǵa jetpes úles qosyp jatqany úshin alǵys aıtamyz», – dedi Arkadıı Dvorkovıch.

Jarystyń ashylý saltanaty naǵyz merekege aınaldy. Astana amfıteatryna lyq tolǵan kórermen qaýym áserli bıdi, teatrlandyrylǵan qoıylymdar men otshashýy bar túrli tústi shoýdy tamashalady. Dástúrli jerebe tartý rásimi ulttyq elementterimen tańǵaldyrdy. Áıgili nemis shahmatshy ıAn Gýstafsen shahmat alańyna asyq tastap, osylaısha óz komandasynyń birinshi týrdaǵy fıgýralarynyń túsin anyqtady.

«Dúnıejúzilik shahmat Olımpıadasy alaýynyń Qazaqstan jerinde jaǵylýy – elimizdiń álemdik shahmat ortalyqtarynyń biri retinde moıyndalýy. Zamanymyzdyń eń úzdik shahmatshylary – Magnýs Karlsen men Hoý Ifan qatysatyn rapıd jáne blıts boıynsha komandalyq álem chempıonatynyń bastalýy shahmat álemi úshin ǵana emes, búkil Qazaqstan sporty úshin aıtýly oqıǵa. Jarysqa elimizdiń kóptegen komandasy men sportshysy, sonyń ishinde áýesqoılar da qatysady», – dep atap ótti KazChess prezıdenti Tımýr Týrlov.

Álem chempıonaty Kongress ortalyǵynda ótedi. 2–4 tamyzda rapıdten 12 raýnd, 5 tamyzda 2 kezeńmen blıts boıynsha júldegerler anyqtalady.