Astanaǵa aǵylǵan sheteldik eńbek mıgranttarynyń 70 paıyzy Ózbekstannan keledi

ASTANA. QazAqparat - Astanada ótken jyly 11 myńǵa jýyq sheteldik azamat ýaqtyly tirkelmegeni úshin jaýapqa tartylyp, onyń 1800-i óz eline qaıtarylǵan. Bul týraly Astana qalasynyń ІІD kóshi-qon polıtsııasy basqarmasynyń basshysy Erketaı Tutqyshev málim etti, dep habarlaıdy «QazAqparat» HAA tilshisi.

Astanadaǵy mıgratsııalyq Halyqqa qyzmet kórsetý ortalyǵynyń ashylý saltanatynda tilshilermen suhbattasqan Erketaı Tutqyshev ortalyqtyń tyń formattaǵy jumysy sheteldik eńbek mıgranttaryna óte yńǵaıly qyzmet usynatynyn aıtady.

«Munda birinshi qabatta «Azamattarǵa arnalǵan úkimet» memlekettik korporatsııasynyń qyzmetkerleri halyqqa qyzmet kórsetedi. Ǵımarattyń ekinshi qabatta kóshi-qon polıtsııasynyń jeke quramy ornalasty. Biz munda memleket tarapynan kórsetiletin qyzmettiń 10 túrin: sheteldik azamattardy tirkeý, vıza berý men ony uzartý, azamattyq alý sekildi qyzmetterdi usynamyz. Mundaǵy birinshi qabattaǵy memlekettik korporatsııanyń qyzmetkeri eńbek mıgrantynyń qujattaryn qabyldaıdy. Odan keıin sheteldik azamat qylmystyq polıtsııa qyzmetkerleriniń tekserýi men medıtsınalyq tekserýden ótip, jınaq kassasynda aqshasyn tólegennen keıin bar-joǵy 1 saǵattyń ishinde osynda eńbek etýge ruqsat alady», - deıdi Erketaı Tutqyshev.

Onyń aıtýynsha, bul protsedýralar úshin buryn mıgranttar salyq organyna jáne medıtsınalyq mekemelerge baryp, úshten bes kúnge deıingi ýaqyttaryn joǵaltatyn. Búgingi kúni sheteldikterdiń osynda eńbek etýge ruqsat alý máselesi biryńǵaı ortalyqta sheshiletin boldy.

Mıgratsııa bólimderi buryn azamattardy Іshki ister organdary mekemesinde qabyldaǵan. Endi osynda jumys tańerteńgi saǵat toǵyzdan keshki alty jarymǵa deıin úzilissiz qabyldaımyz. Demek, bir sózben áýejaı arqyly Astanaǵa ushyp jetken sheteldik azamat birden Astanadaǵy mıgratsııalyq HQKO-ǵa kelip, bir saǵattyń ishinde máselesin sheship ala alady.

«Zańsyz júretinder de bar. Olarǵa qatysty qurylys nysandaryn, ashanalardy tekserip, zańsyz júrgen sheteldikterdi jaýapqa tartyp jatyrmyz. Byltyr 42 myń eńbek mıgrantyn tirkep, jumys isteýge ruqsat berdik. 2017 jyly 11 myńǵa jýyq sheteldik azamat ýaqtyly tirkelmegeni úshin jaýapqa tartyldy. Onyń ishinde 1800-i sot sheshimi boıynsha óz elderine qaıtaryldy. Eńbek mıgranttarynyń 70 paıyzy Ózbekstannan keledi», - deıdi Erketaı Tutqyshev.