Astanaǵa 14 mlrd dollardan astam shetel ınvestıtsııasy tartyldy – Jeńis Qasymbek

ASTANA. QazAqparat – Elordada ótip jatqan baýyrlas qalalar forýmyna 13 memleketten 17 mýnıtsıpalıtet basshylary qatysyp jatyr, dep habarlaıdy QazAqparat tilshisi.

«Qazaq halqy árdaıym óziniń qonaqjaılyǵymen erekshelengen. Elimizdiń astanasy, elordamyz –Astana qalasyna qosh keldińizder. Astana qalasy álem astanalary men mýnıtsıpalıtet basshylaryn qabyldap otyr. Búgingi forým erekshe sebeppen ótýde –Astana qalasynyń 25 jyldyǵy. Baýyrlas qalalar forýmy, álemdik qalalar qatarynda damyp kele jatqan elordamyz úshin asa mańyzdy. Álemniń 13 memleketinen 17 mýnıtsıpalıtet basshylarynyń osy forýmǵa qatysýy –biz úshin úlken mártebe. Árqaısylaryńyzdyń qatysýyńyzdy biz joǵary baǵalaımyz», - dedi Jeńis Qasymbek elordada ótip jatqan Astananyń baýyrlas qalalar forýmynda.

Elorda ákiminiń aıtýynsha, búgingi forým ózara yntymaqtastyqty damytyp, damýdyń jańa modelin qalyptastyrady.

«Astana qalasy – Qazaqstannyń mańyzdy jobalarynyń biri. Alǵash ret HH ǵasyrdyń sońynda qalanyp, ǵasyrlar toǵysyndaǵy shekaradan ótip, bizdiń astanamyz álemdik tanymaldylyqqa ıe boldy jáne búginde damyǵan ekonomıkasy men ınfraqurylymy bar zamanaýı megapolıske aınaldy. 25 jylda qalanyń jalpy ónimi 22 mıllıard dollarǵa, ıaǵnı 10 trıllıon teńgege deıin, al ónerkásip 4,3 mıllıard dollarǵa jetti, ıaǵnı 2 trıllıon teńgege deıin artty», - dedi qala basshysy.

J.Qasymbektiń dereginshe, sońǵy jyldary Astanaǵa 14 mıllıard dollardan astam tikeleı sheteldik ınvestıtsııa tartyldy.

Aıta keteıik, forýmǵa Memleket basshysy Qasym-Jomart Toqaev qatysyp jatyr.