«Astanaenergosbyt» tarıfterdi negizsiz ósirgen

NUR-SULTAN. QazAqparat – «Astanaenergosbyt» JShS tólemderdi negizsiz ósirgen. Osyǵan oraı atalǵan mekemege qatysty ákimshilik is qozǵaldy, dep habarlaıdy QazAqparat tilshisi QR UEM tabıǵı monopolııalardy retteý komıtetine silteme jasap.

«Astanaenergosbyt» JShS qyzmetin tekserý qorytyndylary boıynsha elektr energııasy úshin tólem somalaryn esepteý tártibiniń buzylǵany anyqtaldy. Tutynýshylar negizsiz, joǵary soma tólep kelgen. ıAǵnı júgingen 56 tutynýshynyń 32-ne 129 myń teńge mólsherinde negizsiz soma qoıylǵan. Mysaly, tutynýshylardyń biri 4 aıda artyq tólem jasap, jalpy soma 17 myń teńgeni qurady. Al Nur-Sultan qalasy boıynsha aı saıynǵy ortasha tólem - 4,5 myń teńge», - delingen resmı aqparatta.

Sondaı-aq, habarlamada atalǵan mekemege qatysty ákimshilik is qozǵalǵany aıtylǵan.

«Astanaenergosbyt» JShS-na qatysty QR ákimshilik quqyq buzý kodeksiniń 167-baby boıynsha ákimshilik is qozǵaldy. Oǵan sáıkes 2000 AEK nemese 6 mln teńgeden asa aıyppul kózdelgen», - deıdi vedomstvodan.

Odan bólek, «Astanaenergosbytqa» zańsyz júrgizilgen tólem somalaryn qaıta eseptep, kemshilikterdi joıý týraly nusqama berildi.

«Tutynýshylar usynylǵan shottardyń negizsiz artyq kóterilgenin anyqtaǵan jaǵdaıda, qaıta esepteý júrgizý úshin «Astanaenergosbyt» JShS-na júginýge quqyly. Eger mekeme qaıta esepteýden negizsiz bas tartqan jaǵdaıda, tutynýshylar QR Ulttyq ekonomıka mınıstrligi tabıǵı monopolııalardy retteý komıtetiniń Nur-Sultan qalasy boıynsha departamentine júgine alady», - dep habarlaıdy komıtet.

Aıta keteıik, atalǵan kemshilikter tutynýshylardyń ótinishteri negizinde júrgizilgen jospardan tys tekserýdiń nátıjesinde anyqtalyp otyr.

Eske salsaq, «Astanaenergosbyt» JShS-ne 6 mln teńgeden astam aıyppul salynýy múmkindigi buǵan deıin aıtylǵan edi.