Astanadan úı alyp qoıý kerek deıtinder az emes - Maqsat Halyq

<p>ASTANA. KAZINFORM &ndash; Elimizdiń ár óńirinen Astanaǵa arman qýyp keletinder az emes. Al keıingi ýaqytta Almatyda jer silkinýi jıi tirkelip, qala turǵyndary arasynda elordaǵa qonys aýdarýǵa nıettiler kóbeıgeni sóz bola bastady. Osy oraıda, sarapshylar Astanadaǵy páterlerdiń baǵasy qymbattap jatqanyn alǵa tartyp otyr.</p>

Krisha.kz saıtynyń saraptamalyq bólimi usynǵan málimetke súıensek, bıyl aqpanda ekinshi naryqtaǵy turǵyn úılerdiń baǵasy tómendeı bastaǵan.

«Monıtorıng júrgizilgen 18 qalanyń toǵyzynda baǵanyń tómendeýi tirkeldi. Ásirese, Aqtaý qalasynda aıtarlyqtaı bilindi (2,4%). Astanada páter baǵasy bir aıda 2 paıyzǵa ósti. Almaty men Shymkentte shamaly ósý baıqalady», – delingen zertteý maqalada.

Páter baǵasy eń joǵary qalalar (1 sharshy metrine): Almatyda - 724 myń teńge, Astanada - 485 myń teńge, Shymkentte - 421 myń teńgege baǵalanady. Al eń arzan páter Qyzylorda (238 myń teńge) men Aqtóbede (290 myń teńge).

Foto: Kazinform

Mamandar málimetinshe, Almatydaǵy jer silkinisi baǵa saıasatyna qatty áser ete qoımaǵan.

«5 naýryzdaǵy aqparat boıynsha, Almatyda úı satýǵa baılanysty jańa habarlandyrýlar baıqalmaıdy. Astana qalasynda da suranys artqan joq. Bir ǵana ózgeris bar. Almatylyqtardyń saǵatpen jalǵa beriletin jeke úılerge degen suranystary arta bastady. Naqtylasaq, táýligine 3 esege ósip otyr. Bul – jer silkinisi saldarynan ýaqytsha baspana izdegennen, qala berdi, alda kele jatqan merekelerge baılanysty», – deıdi sarapshylar.

Al belgili sarapshy Maqsat Halyqtyń aıtýynsha, Astanada páter quny qymbattaýy múmkin, bul – zańdylyq.

«Elordada páter baǵasynyń kóterilýi qalypty jaǵdaı. Almatydaǵy jer silkinisinen keıin «Astanadan úı alyp qoıý kerek» deıtinder az emes. Qazirdiń ózinde Almatyda 6-qabattan joǵary ornalasqan páterlerdiń baǵasy arzandap jatyr. Jer silkinisi jıilep ketse, ońtústik astanalyqtar ózge óńirge qonys aýdarmaı, elordany betke alatyny anyq. Sáıkesinshe, Astanadaǵy páter baǵasy qymbattaı túsedi. Biraq, qymbatshylyqty qalypty jaǵdaı dep te, ýaqytsha jaǵdaı dep te baǵalaýǵa bolady», – deıdi sarapshy.