Astanadan 800 ulan áskerı boryshyn óteýge attandy

ASTANA. QazAqparat - Astanada QR Qorǵanys mınıstrliginiń áskerı bólimderi qatarynda áskerı boryshyn óteýge shaqyrylýshylardy saltanatty túrde shyǵaryp salý rásimi ótti, dep habarlaıdy elorda ákimdiginiń resmı saıty.

Qala ákimdiginiń aldyndaǵy alańda Otan qorǵaýshylar kúni qarsańynda «Qazaqstannyń ár azamatynyń boryshy - el qorǵaý» aktsııasy bolyp ótti. Saltanatty shyǵaryp salý keshine Astana ákiminiń orynbasary Ermek Amanshaev, Qarýly kúshter bas shtabynyń bastyǵy Murat Maıkeev, ardagerler uıymy men memlekettik organnyń ókilderi qatysty.

«Sizder Otanymyzdyń júregi Astana qalasynan úlken jaýapty jolǵa attanyp bara jatyrsyzdar. Sizderdi alda Otan qorǵaý degen qasıetti borysh kútip tur. Ákimdiktiń atynan osy bir tolqymaly sátpen quttyqtaı otyryp, aldaryńyzǵa qoıylǵan mindetti abyroımen atqarady dep senemin», - dedi E. Amanshaev.

Saltanatty is-sharaǵa jasóspirimderge arnalǵan klýbtar men úıirmelerdiń tárbıelenýshileri men astanalyq mekteptiń oqýshylary shaqyryldy. Úsh myńnan astam kórermen jekpe-jek oıyndaryn, kadetterdiń valsin, jarylǵysh zattardy ıiskep tabatyn ıtterdiń teatrlandyrylǵan qoıylymyn tamashalady.

Esterińizge sala keteıik, Qazaqstanda jedel áskerı qyzmetke kóktemgi shaqyrylym tolyq kólemde júrip jatyr. Áskerı qyzmetke 1991-2000 jyly týylǵan azamattar shaqyrylýda.