Astanadaǵy ulttyq akademııalyq kitaphanada «Qazaq hany Abylaı» tarıhı romanynyń tusaýkeseri ótedi
22:06, 26 Qazan 2015
ASTANA. QazAqparat - 27 qazanda Astanada QR Ulttyq akademııalyq kitaphanasynyń «Myrzataı Joldasbekovtiń memorıaldyq kitap kollektsııasy» zalynda jazýshy Dáýletbek Qańbaqovtyń «Qazaq hany Abylaı» atty tarıhı romanynyń tusaýkeseri ótedi, dep habarlady kitaphananyń baspasóz qyzmeti.
Kitap Qazaq handyǵynyń 550 jyldyǵyna baılanysty baspa betin kórip otyr. Tarıhı týyndyda Abylaı hannyń ómir joly, qoǵamdyq qyzmetteri týraly jan-jaqty baıandalady. Tarıh bederinde nebir tar jol, taıǵaq keshýdi bastan keshken ultymyzdyń uly perzentiniń kórkem beınesi arqaý bolǵan tarıhı romannyń kóterer júgi aýyr.
Kitap avtory Dáýletbek Qańbaqov 1942 jyly QHR Shyńjań ólkesi Nylqy aımaǵynda dúnıege kelgen. Qalamger «Jas qaraǵaı», «Jyl lebizderi», «Qaınar kóz», «Muralardan ulaǵat» tárizdi kitaptarymen oqyrman qaýym tanys.
«Folıant» baspasynan jaryq kórip otyrǵan jańa týyndynyń tusaýkeserine elordalyq zııaly qaýym ókilderi, ádebıetshi-ǵalymdar jáne kitaphana oqyrmandary qatysady.