Astanadaǵy tozyǵy jetken úıler máselesi qalaı sheshiledi

ASTANA. QazAqparat - Astana qalasynyń ákimi Baqyt Sultanov elordadaǵy tozyǵy jetken úıler máselesin sheshý joldaryn aıtyp berdi, dep habarlaıdy QazAqparat tilshisi.

Qazirgi ýaqytta barlyq ózekti máselelerdi anyqtaý úshin ákimdik qala mańyndaǵy eldimekenderdiń tizimin alýda.

«Bul máselege birjaqty qaraýǵa bolmaıdy. Tolyqqandy keshendi sheshim qarastyrylyp jatyr. Onyń ishinde Nurly jer arqyly júzege asyryp jatqan baǵdarlamalardy toǵystyrýǵa qarjy bólindi. Tozyǵy jetken úılerdi buzý baǵdarlamasy jasalýda, aldanǵan úleskerlerdiń máselesin sheshýge qarajat bólindi. Qala shetindegi máselelerdi sheshý úshin barlyq resýrstardy biriktirip, «Nurly jer» boıynsha baspana salý baǵdarlamasyna qosýdy kózdep otyrmyz. Bul baǵytta nátıjege jetý úshin áleýmettik kómek pen tólem qabiletin zertteý qajet. Sondyqtan, úkimette qurylǵan jumys toby aıasynda bul usynys qarastyrylady. Biz de apatqa qatysty arnaıy komıssııa qurdyq», - dep jaýap berdi ákim Memlekettik qyzmet isteri jáne sybaılas jemqorlyqqa qarsy is-qımyl agenttiginde jýrnalısterge.

Eske sala keteıik, 4 aqpan kúni túnde elordanyń Saryarqa aýdanyndaǵy «Kóktal-1» turǵyn úı alabynda jeke úıdiń aýlasynda turǵyzylǵan ýaqytsha baspanada órt shyqty. Órtti sóndirý barysynda 2006, 2008, 2014, 2016, 2018 jylǵy 5 qyz balanyń denesi tabyldy.

Olardyń kishisi nebári 11 aılyq sábı edi. Órt kezinde bes balanyń ata-anasy túngi jumysta bolǵan.