Astanadaǵy Óńirlik habqa Amerıkalyq memlekettik basqarý qoǵamy qyzyǵýshylyq týdyrdy
Onda Habqa qatysýshy elderdegi memlekettik qyzmet reformasy Amerıkalyq memlekettik basqarý qoǵamynyń qyzyǵýshylyǵyn týdyrdy, dep habarlaıdy QazAqparat.
Sessııanyń ashylý barysynda Astanadaǵy memlekettik qyzmet salasyndaǵy Óńirlik habtyń basqarýshy komıteti tóraǵasy Álıhan Baımenov pen ASPA prezıdenti Djenıs Lachans sóz sóıledi. Álıhan Baımenov Habqa qatysýshy-elderdiń memlekettik qyzmetin jetildirýde Amerıkalyq memlekettik basqarý qoǵamymen yntymaqtastyqtyń mańyzyn atap ótti.
«Aımaq elderi damýdyń ózindik jolyn tańdady, óz basymdyqtaryn belgiledi jáne qazir olar - memlekettik qyzmettiń ártúrli deńgeıinde. Olardaǵy reformalar barysy mádenı-tarıhı jáne áleýmettik-ekonomıkalyq kontekst arqyly, ári saıası jigerdiń bolýymen anyqtalady. Soǵan qaramastan, bul elderde zamanaýı memlekettik qyzmet qurý boıynsha ortaq umtylys bar», - dedi Álıhan Baımenov.
«Sessııa barysynda Ortalyq Azııa men Kavkaz elderi memlekettik qyzmet júıesindegi negizgi úrdister jaıynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi apparat jetekshisi Saıan Ahmetjanov baıandama jasaǵan bolatyn. Budan bólek, Ázerbaıjannyń Memlekettik emtıhan ortalyǵy dırektory Vafadar Mısırov, Grýzııanyń memlekettik qyzmet Bıýrosynyń dırektory orynbasary Maıa Dvalıshvılı, Qyrǵyzstan Prezıdenti janyndaǵy Memlekettik qyzmet akademııasy rektory Almaz Nasyrov baıandady. Al memlekettik qyzmettegi jańashyl baǵyttar, onyń ishinde tıimdi, ashyq jáne esep beretin memlekettik qyzmetti qalyptastyrýdy kózdeıtin elektrondy basqarýdy engizý boıynsha Estonııanyń elektrondy basqarý Akademııasy ókili Hannes Astok óz eliniń tájirıbesimen bólisti», - delingen baspasóz baıanynda.
Tutastaı alǵanda barlyq qatysýshylar aımaqta memlekettik qyzmetti damytý boıynsha áriptestiktiń mańyzyn, tájirıbe jáne bilim almasýdyń tıimdi tuǵyrnamasyna aınalǵan Habtyń biregeı rólin atap ótti.
Aımaq elderindegi memlekettik qyzmet júıesindegi transformatsııalyq ózgerister týraly talqylaýlarǵa TMD, Kavkaz jáne Ortalyq Azııa elderindegi memlekettik organdar, oqý oryndary, halyqaralyq uıymdar ókilderi sarapshylar men praktıkter qatysty.
«Habqa qatysýshy elderdegi memleketti basqarýdy damytý boıynsha Ońtústik Kalıfornııa ýnıversıtetiniń qurmetti professory Chester Nıýland, ASPA burynǵy prezıdenti Stıv Kondrı, Nıý-Iorktiń Qalalyq ýnıversıteti professory Demetrıos Argırıades, AQSh-tyń joǵarǵy memlekettik qyzmetkerleriniń biliktiligin arttyrý Federaldy ınstıtýty dırektory Fletcher Honımýnd sııaqty memlekettik basqarý salasyndaǵy jetekshi ǵalymdar men sarapshylar pikir almasty. Olardyń basym bóligi memlekettik qyzmetti damytýdaǵy Habtyń aıryqsha rólin baǵalaǵan bolatyn. ASPA Halyqaralyq Assambleıasy qatysýshylary da osy máselege toqtaldy», - delingen
taratylǵan habarlamada.