Astanadaǵy qysqy bal: Uıymdastyrýshylar qaıyrymdylyq jobalarǵa 80 mln teńgeden astam qarjy jınady
«Biz úshin eń aldymen qarajat jınaý, sonymen qatar qorymyzdyń tarapynan júzege asyrylatyn jobalardy qysqasha tanystyrý da óte mańyzdy», - dedi Dınara Gaplan.
Bıyl Qazaqstan Respýblıkasy Prezıdenti Teleradıokesheniniń belsendi aqparattyq qoldaýymen ótip jatqan qaıyrymdylyq balynyń arqasynda 10 jyldyń ishinde 800 mıllıon teńgeden astam qarajat jınaldy. «Bolashaq» qory túsken qarajatqa 70 mamandandyrylǵan ońaltý mekemesin, onyń ishinde Qazaqstannyń 22 qalasynda 46 ınklıýzıvti qoldaý kabınetin ashty jáne jabdyqtady. Inklıýzıv salasynda 500-den astam mamandandyrylǵan jumys orny ashyldy. 3 myń maman men ata-ana ınklıýzıvti bilim berý men minez-qulyqty qoldanbaly saralaý boıynsha oqýdan ótti. Az qamtylǵan otbasylardan shyqqan balalarǵa jáne erekshe qajettiligi bar adamdarǵa 93 jol júrý jáne 17 bilim berý grantty taǵaıyndaldy.
Uıymdastyrýshylardyń atap ótýinshe, erekshe balalardyń quqyqtaryn júzege asyrý úshin «Bolashaq» qory ınklıýzıvti bilim berý bóliginde QR zańnamalyq aktilerine 70-ten astam sapaly usynym men túzetýler enigizdi.
Sonymen qatar qordyń qoldaýymen jyl saıyn dısleksııasy men dısgrafııasy bar 500-den astam bala bilikti mamandardan kómek alady. Halyqaralyq gendik dermatoz jónindegi qaýymdastyqqa operatsııalar jasaýǵa, arnaýly kosmetıkalar satyp alýǵa jáne jumys ereksheligi býllezdi epıdermolızmge (kóbelek balalar) shaldyqqan balalarmen jumys isteý sanalatyn qazaqstandyq dárigerlerdiń bilimin jetildirýge járdemdesti.
Jyldan jylǵa kóptegen kompanııa áleýmettik jaýapkershilik tanytyp, baldy uıymdastyrýǵa qoldaýkórsetip keledi. Osy jyldardyń ishinde baldy ótkizýge 150-den astam demeýshi men seriktes qosyldy.
Biregeı lottar – óner týyndylary, antıkvarıattar men sporttyq atrıbýtıkalar bássaýdasy keshtiń shyrqaý shegine aınaldy.
Bıyl saýda-sattyqqa 1940-1950 jyldary qoldan toqylǵan kilem, «Bórte» qoıylymy bas keıipkeriniń sáýkelesi, AQSh-tyń 14-shi Prezıdenti Franklın Pırstiń qoly qoıylǵan 1856 jylǵy jer ýchaskesin usyný týraly qujat, 1911 jylǵy búkil álem halyqtary ánderiniń nota kitaby, asyl tuqymdy Angýs iri-qara maly jáne basqa da lottar shyǵaryldy.
Dańqty «Dos-Muqasan» tobynyń gıtarasy bássaýdanyń basty lotyna aınaldy. Mýzykalyq aspapty ansambldiń negizin qalaǵan Dosym Súleev syıǵa tartqan. Ol dál osy gıtaramen «Jan dosym» ánin shyǵarǵan edi. Biregeı gıtara men «Dos-Muqasan» tobynyń vınıldi plastınkaǵa jazylǵan alǵashqy hıt ánderi aýktsıonda 11 mıllıon teńgege satyldy. Qor seriktesteriniń atynan tigilgen baǵaly syılyqtar utysy da kesh qonaqtarynyń kóńiline qýanysh syılady.
Jalpy, ár jyldary Qysqy qaıyrymdylyq balyna Aleksandr Vınokýrov, Ilıa Ilın, Gennadıı Golovkın syndy Olımpıada chempıondary men tanymal sportshylar qoldaý kórsetti.
Uıymdastyrýshylardyń aıtýyna qaraǵanda, bal tarıhyndaǵy eń qymbat lot rejısser Aqan Sataevtyń «Tomırıs» fılmindegi rekvızıt – Tumar patshaıymnyń alqasy boldy.
30 jup debıýtanttardyń jarqyn qoıylymdary bal qonaqtarynyń kóńilinen shyqty. Qysqy qaıyrymdylyq baldaryn qoıýshy-horeograf, Qazaq ulttyq horeografııa akademııasynyń aǵa oqytýshysy, Qazaqstan Respýblıkasynyń bı sporty federatsııasynyń múshesi Evgenıı Moıseevpen birge mamandyqtary ár túrli jastar birneshe aı boıy bar yqylasyn salyp jattyqty.
Dástúrli túrde bal debıýtanttardyń óner kórsetýimen bastalady. Osydan keıin is-sharaǵa qatysýshylardyń bári vals bıleıdi.
Qysqy bal – bul mán-maǵynasy bar is-shara. Tipti debıýtanttardy irikteýde, kastıng ýaqytynda volonterlik qyzmette tájirıbesi bar jastarǵa basa nazar aýdarylady. Olar sol arqyly qordyń júıeli jobalaryna qoldaý kórsetedi, dep atap ótedi uıymdastyrýshylar.
Bal debıýtanttarynyń biri, 24 jastaǵy Dıas Myrzalıev mundaı is-sharaǵa alǵash ret qatysqan.
«Tarazdyń týmasymen, Astanada turyp jatqanyma 2 jyl boldy. Stýdent kezimde, sonaý 2017 jyly-aq balǵa qatysqym kelgen edi. Biraq, Almatyda oqyp júrgendikten sáti túspedi. Astanaǵa qonys aýdara salysymen áleýmettik jeliler arqyly jiti qadaǵalaı bastadym. Bıyl jarnamany kóz shalǵan sátten-aq tirkeldim. Bosqa daıyndalmadyq, senimdi bılep shyqtyq. Eń aldymen úlken bir istiń, qaıyrymdylyq sharanyń bóligi bolǵym keldi. Bul is-shara kóptegen balaǵa kómektesedi», - dedi Dıas.
Inklıýzıvti bilimdi jáne talantty jastardy qoldaý maqsatynda ótken qaıyrymdylyq balynda 80 mln teńgeden astam qarajat jınaldy.
Jınalǵan qarajat qordyń «Ár balaǵa laıyqty mektep» jáne «Jol júrý granttary» áleýmettik jobalaryn júzege asyrýǵa jumsalatyn bolady. Qaıyrymdylyq qarajatynyń qaıda jaratylyp jatqany ashyq bolýy úshin qordyń bolashakcharity.kz saıtynda qarjylyq esep-qısap jarııa etiledi.
«Inklıýzııa – bul qarapaıym mektepte oqıtyn aýtızmi bar balalardyń quqyqtary ǵana emes. Bul Daýn sındromy, sal arýyna shaldyqqan balalardyń, ımmıgrant búldirshinderdiń, ómirlik qıyn jaǵdaıǵa tap bolǵan jáne ózge de sanattaǵy balalardyń da quqyqtary. QR Konstıtýtsııasyna jáne barlyq adamzat zańdaryna sáıkes, ár balada sapaly bilim alý jáne darynyn damytý múmkindigi bolýy tıis. Bilim – shyn máninde salym salýdy qajet etetin sala. Óıtkeni, bolashaq bilimdi ulttyń arqasynda qalyptasady», - dep atap ótedi qordan.
2022 jylǵy XIII Qysqy qaıyrymdylyq baly aqparattyq seriktesteriniń biri «QazAqparat» halyqaralyq aqparat agenttigi men Jibek Joly telearnasy boldy.