Astanadaǵy kolledj jataqhanalarynda bóten adamdardyń turatyndyǵy anyqtaldy

ASTANA. QazAqparat - QR Sybaılas jemqorlyqqa qarsy strategııasynyń iske asyrylýyna taldaý men baǵalaý júrgizetin arnaıy monıtorıngtik top elorda kolledjderiniń jataqhanalaryn tekserdi, dep habarlaıdy QazAqparat tilshisi.

Astananyń 25 kolledjine júrgizilgen tekserý nátıjesi Memlekettik qyzmet isteri jáne sybaılas jemqorlyqqa qarsy is-qımyl agenttiginiń Astana qalalyq departamentiniń alqa májilisinde jarııa etildi.

«Tekserýde kolledjderdegi synaq tapsyrý protsesi, qujat qabyldaý, granttardyń ádil bólinýi qadaǵalandy. Sonymen birge, jataqhanalar da nazarǵa alyndy. Joǵary medıtsınalyq kolledjde oqytýshy 12 sharshy metr bólmede óz otbasymen turyp kelgen. Aı saıyn 25 myń teńge tólegen. Ózge bólmelerde 4 stýdent jylyna 50 myń teńgeden tólep turady», - dedi Arnaıy monıtorıngtik top tóraıymy, Astana JSDP Áıelder qanatynyń múshesi Jamal Dorjyǵulova.

Bul ǵımaratty tóraıym jaqyn mańda ornalasqan gýmanıtarlyq kolledj jataqhanasymen salystyrdy.

«Gýmanıtarlyq kolledj jataqhanasy taza, jóndelgen, onda stýdentter shyǵarmashylyqpen aınalysatyn qosymsha bólmeler bar. Bir bólmede 2 stýdent turady, onda shkaftar men týmbalar ornatylǵan. Mundaı bólme úshin stýdentter jylyna 30 myń teńgeden 60 myń teńge beredi. Al medıtsınalyq kolledjdiń eski tar bólmesi úshin 4 stýdent 200 myń tóleıdi», - dedi Jamal Dorjyǵulova.

Ol kóp tabys tabatyn jataqhanalardyń óz baǵasyna laıyq bolýy qajettigin jetkizdi.

«Ondaǵy turmystyq bólmeler men býfetter eski jıhaz saqtaıtyn qoımanyń rólin atqarýda. Mundaǵy birneshe bólmede bóten adamdardyń turatynyn baıqadyq. Balalardyń aıaq kıimi turǵan bólmelerdiń esigin eshkim ashpady. Polıtehnıkalyq kolledj jataqhanasynyń da jaǵdaıy máz emes. Jóndeý jumystary úshin stýdentterden 2 500-3 000 teńgeden zańsyz aqsha jınalǵan. Ol jaqtan da bóten turǵyndardy taptyq jáne órt qaýipsizdigi saqtalmaǵan», - dedi Jamal Dorjyǵulova.