Astanadaǵy QK áskerı qyzmetshileriniń qaıyrymdylyq júgirýine ózge de qalalar qosyldy (FOTO)

ASTANA.QazAqparat - Astanada ótken QR Qarýly Kúshteriniń alǵashqy qaıyrymdylyq júgirýi elordalyqtardyń arasynda qyzyǵýshylyq týǵyzyp qana qoımaı, sonymen birge Qazaqstannyń basqa da qalalarynda áskerı qyzmetshiler men qoǵam tarapynan qoldaý tapty.

QR QM baspasóz qyzmetiniń habarlaýynsha, 25 qazanda uqsas is-sharalar áskerı qyzmetshilerdiń, qoǵam qaıratkerleriniń, jýrnalıster men shahardyń belsendi turǵyndarynyń qatysýymen Almatyda, Aqtóbede jáne Oralda ótken.

«Biz bir ýaqytta Almatyda júgirdik. Sonymen qatar «Meıirim» qorynyń shotyna onlaın túrinde qarajat aýdardyq. Marafondy ótkizý ıdeıasy óte jaqsy, mundaı marafondardy bolashaqta Almatyda ótkizýge bolady. Áskerı qyzmetshilerdiń qaıyrymdylyq kórsetý bastamasy qazaqstandyqtar arasynda qoldaý taýyp, aýqymdyraq bolyp, aldaǵy ýaqytta udaıy ótkizilip tursa quba-qup bolar edi», - deıdi taýly daıarlyq jónindegi komanda bastyǵy QR QM AOSK-nyń aǵa leıtenanty Maqsut Jumaev.

Qaıyrymdylyq is-sharaǵa mundaı jan-jaqty atsalysý kómekke muqtaj balalarǵa qoldaý kórsetý bolyp tabylady.

25 qazanda «Otan qorǵaýshylar» alańynda «Áskerı áýlet» baıqaýy sheńberinde QR QK qaıyrymdylyq júgirýi ótkizilgenin esterińizge sala keteıik. Oǵan 700-den asa adam, ıaǵnı, QR Qorǵanys mınıstrliginiń, Aqmola garnızonynyń, QR Qarýly Kúshteri quramalary men bólimderiniń áskerı qyzmetshileri, olardyń otbasy músheleri, sondaı-aq qoǵam qaıratkerleri, estrada ártisteri, elorda turǵyndary men qonaqtary qatysty.

Júgirý barysynda jınalǵan barlyq qarajat «Meıirim» qoǵamdyq qory men «Balalarǵa ómir syıla» qoryna tapsyrylatyn bolady.