Astanadaǵy QazATÝ-dyń stýdenttik jataqhanasy eń úzdik dep tanyldy - Qazaqstan stýdentteriniń alıansy

ASTANA. Qańtardyń 30-y. QazAqparat - Qazaqstan stýdentteriniń alıansy respýblıkadaǵy joǵary oqý oryndardyń stýdenttik jataqhanalary arasynda «Qalaı turyp jatyrsyń, stýdent?» aktsııasyn ótkizip, úzdik stýdenttik úıdi anyqtady,

dep habarlaıdy QazAqparat.

Qazaqstan stýdentteriniń alıansy aktsııany ótken jyldyń qazan-qarasha aılarynda ótkizip, jiti taldaýdan keıin nátıjesin shyǵardy. «Aktsııa barysynda 92 jataqhananyń turmys-tirshiligin sarapqa saldyq. Qazaqstan stýdentteri alıansynyń aımaqtaǵy músheleri synǵa túsken jataqhanalardyń barlyǵyn aralap, jaǵdaıyn kózben kórdi», - deıdi Alıanstyń kóshbasshysy Taqan Ǵızzatov.

T.Ǵızzatovtyń aıtýynsha, sharanyń basty maqsaty - stýdentterdiń turmys-tirshiligimen jete tanysyp, olardyń hal-ahýalyn bilý, tekseris qorytyndysynda talapqa saı kelmeıtin jataqhanalar men úzdikterdiń reıtıngisin anyqtaý boldy.

Báıgege túsken 92 jataqhananyń 74-i sońǵy eki jylda kúrdeli jóndeýden ótken. Olardyń 66 paıyzdan astamynda bir bólmede 3-4, al 13 paıyzynda 4 jáne odan da kóp stýdentter turady. Degenmen, jataqhanalardyń 21 paıyzynda bir jáne eki kisilik bólmeler de boldy.

Tekseris barysynda 8 jataqhanada qaýipsizdik erejeleri saqtalmaıtyndyǵy anyqtalǵan. Taǵy birqatarynda stýdentterge qolaıly jaǵdaılardyń jasalmaǵandyǵy málim boldy. Máselen 15-inde kir jýý oryndary, 3-ýinde as daıyndaıtyn bólmeler men demalý oryndary qarastyrylmaǵan.

Alıans kóshbasshysy jataqhanalardyń 79 paıyzy synaqtardan súrinbeı ótkendigin aıtady. Áıtse de, kommýnaldyq kúıi kelispegen turǵyn-jaılar da bolǵan. Máselen, tekserilgenderdiń tek 48 paıyzy ǵana talaptarǵa tolyq saı kelgen. Al jataqhanalardyń barlyǵyna ortaq kemshiligi - ınternetke qol jetimsizdik. ıAǵnı synǵa túsken 92 turǵyn-jaıdyń tek 28-i ǵana ǵalamtorǵa qosylǵan boldy.

Aktsııa qorytyndysy boıynsha eń úzdik stýdenttik jataqhana bolyp Astanadaǵy S.Seıfýllın atyndaǵy Qazaq agrotehnıkalyq ýnıversıtetiniń №5 jataqhanasy tanyldy. Úzdik úshtiktiń qatarynda sondaı-aq, Ál-Farabı atyndaǵy Qazaq Ulttyq memlekettik ýnıversıtetiniń №18-shi jáne ıAsaýı atyndaǵy Halyqaralyq Qazaq-túrik ýnıversıtetiniń №1-shi jataqhanalary bar.

T.Ǵızzatovtyń atap kórsetkenindeı, úzdik dep tanylǵan astanalyq joǵary oqý ornynyń turǵyn-jaıynda - kishigirim kitaphanamen qosa, tigin tsehy, aıaq kıim jóndeý sheberhanasy, ǵalamtorǵa qosylǵan kompıýterlik synyptar jáne sóılesý pýnktteri jumys isteıdi.