Astanadaǵy HQKO-larda prokýratýra organdaryna ótinish joldaýǵa arnalǵan joba iske qosyldy

ASTANA. QazAqparat - Astanadaǵy Halyqqa qyzmet kórsetý ortalyqtary arqyly prokýratýra organdaryna ótinishter men aryzdardy joldaýǵa bolady. Bul týraly búgin ótken baspasóz máslıhatynda QR Bas prokýratýrasy Aryz-shaǵymdardy qaraý týraly zańdardyń qoldanylýyna qadaǵalaý jáne is júrgizý basqarmasanyń basshysy Lázzat Janysova málim etti.

«Elimizdiń azamattary Halyqqa qyzmet kórsetý ortalyqtaryna jıi baratynyn eskere otyryp, qosymsha el azamattarynyń ótinish berýine múmkindik jasaý turǵysynda biz Baılanys jáne aqparat agenttigimen birlese bıyldyń 2 maýsymynan bastap HQKO-lar arqyly ótinishterdi qabyldaýdyń qanatqaqty jobasyn iske qostyq. Ázirge ol Astana qalasynyń ortalyqtarynda júzege asyrylýda», - dedi ol.

L. Janysovanyń sózine qaraǵanda, atalǵan joba arqyly Bas prokýratýraǵa nemese elordanyń prokýratýra organdaryna joldanǵan ótinishter qabyldanady.

Jalpy prokýratýra organdaryna ótinishterdi birneshe tásilder arqyly jiberý qarastyrylǵan. Azamattar jekeleı ózi tapsyrý, hattar jáshigine salý, jeke qabyldaýǵa kelý nemese poshta arqyly jiberý múmkindikterin paıdalana alady.

«Degenmen prokýratýra organdary elektrondy is júrgizýge kóshkeli keıbir ІT-tehnologııalar iske qosyldy. Ol úshin bizde arnaıy qyzmet kórsetý ortalyǵymyz bar. Onda biryńǵaı tegin «115» nómirli telefon baılanysy men www.115.kz elektrondy portaly jumys isteýde. Bul portal arqyly kez kelgen azamat prokýratýra organdaryna óziniń ótinish bere alady», - dedi ol.

Budan bólek, L. Janysova Bas prokýror men onyń orynbasarlary azamattardy jáne uıymdardyń ókilderine aı saıyn jeke qabyldaý ótkizetindigin eske salyp ótti. Oblys prokýrorlary men olardyń orynbasarlary mundaı jeke qabyldaýdy apta saıyn júzege asyrsa, aýdandyq jáne qalalyq prokýrorlar kún saıyn qabyldaý ótkizedi.