Astanadaǵy birqatar kóshege el tulǵalarynyń esimi beriledi

ASTANA. QazAqparat – Astana máslıhatynyń depýtattary qalanyń ondaǵan kóshesine belgili tulǵalardyń esimin berý týraly ákimdik sheshimin maquldady, dep habarlaıdy QazAqparat tilshisi.

Sheshim jobasyn depýtattarǵa qalalyq tilderdi damytý jáne muraǵat isteri basqarmasynyń basshysy Sáken Esirkep tanystyrdy.

Atap aıtsaq, Almaty aýdany boıynsha №A-24 jobalyq kóshege kórnekti memleket qaıratkeri Oral Muhamedjanovtyń esimin, №A-62 jobalyq kóshege Qazaqstannyń Halyq jazýshysy, dramatýrg Safýan Shaımerdenovtiń esimin, Abylaıhan dańǵylyndaǵy Dına Núrpeıisovanyń janynda ornalasqan ataýsyz alleıaǵa «Kúıshiler alleıasy» degen at berý usynyldy.

Al Esil aýdany boıynsha №202 jobalyq kóshege áskerı ushqysh, shtýrmovık, Keńes odaǵynyń batyry Nurken Ábdirovtiń esimin, E-111 jobalyq kóshege Qazaqstannyń Halyq jazýshysy, qoǵam qaıratkeri, Qazaqstannyń eńbek sińirgen mádenıet qyzmetkeri Sherhan Murtazanyń esimin, E-324 jobalyq kóshege kórnekti jazýshy Dúkenbaı Dosjannyń esimin, E-325 kóshege kompozıtor, KSRO Halyq ártisi, Qazaq KSR memlekettik syılyǵynyń laýreaty Erkeǵalı Rahmadıevtiń esimin, E-357 jobalyq kóshege hırýrg, akademık Aleksandr Syzǵanovtyń esimin, E-577 jobalyq kóshege jazýshy Hamza Esenjanovtyń esimin, E-579 kóshege memleket jáne qoǵam qaıratkeri, «Qurmet» belgisiniń ıegeri Qarıdın Qarbaevtyń esimin, E-580 jobalyq kóshege memleket qaıratkeri Sabyr Nızıabektovtiń esimin berý, E-607 jobalyq kóshege Qazaqstannyń Halyq ártisi Quman Tastanbekovtiń atyn, E-608 jobalyq kóshege pedagog, Qazaqstannyń Halyq ártisi Sholpan Jandarbekovanyń esimin, E-757 jobalyq kóshege jazýshy, fılolog Aqseleý Seıdimbektiń esimin, E-758 jobalyq kóshege Birikken Arab Ámirlikteriniń Prezıdenti, QR Birinshi dárejeli «Dostyq» ordeniniń ıegeri sheıh Halıfa ben Zaıd ál Nahaıannyń esimin, E-89 jobalyq kóshege, aǵartýshy, pýblıtsıst, zańger Barlybek Syrttanulynyń esimin, E-890 jobalyq kóshege tarıhshy, akademık Ermuhan Bekmahanovtyń esimin, E -898 jobalyq kóshege ádebıet synshysy, fılolog, QR Eńbek sińirgen ǵylymı qyzmetkeri Tursynbek Kákishevtiń esimin berý, Qabanbaı batyr dańǵylyndaǵy «Saltanat saraıy» kesheni men The St. Regis Astana qonaq úıiniń arasyndaǵy ataýsyz skverge Ulybrıtanııa jáne Soltústik Irlandııa birikken koroldiginiń patshaıymy ІІ Elızavetanyń esimin berý kózdelip otyr.

Sondaı-aq Saryarqa aýdany boıynsha №20-40 jobalyq kóshege áıgili jazýshy Sábıt Muqanovtyń esimin berý usynyldy.

Depýttar ákimdik usynysyn qoldap daýys berdi.