Astanadaǵy áýejaıdyń jańa termınaly alǵashqy halyqaralyq reısti qabyldady

ASTANA. QazAqparat - 5 maýsymda Astana halyqaralyq áýejaıynyń jańa termınaly «Aeroflot» áýe kompanııasynyń Máskeý- Astana reısimen kelgen alǵashqy jolaýshylardy qabyldady. Bul kúni jańa termınal Airbus- 320 ushaǵymen Máskeýge ushqan jolaýshylarǵa qyzmet kórsetti.

«Astana halyqaralyq áýejaıy» baspasóz qyzmetiniń habarlaýynsha, sondaı-aq, halyqaralyq baǵdarlarǵa Tashkentke («Ózbek áýejoly») men Frankfýrtke («Lufthansa») ushaqtar jiberý josparlanyp otyr.
«Barlyǵy Astana áýejaıynyń jańa termınalynyń ashylýyn kútti. Mine, endi biz halyqaralyq áýejaı arqyly jolaýshylardy kútip alyp, shyǵaryp salýdy bastadyq», - deıdi Astana halyqaralyq áýejaıynyń Basqarma tóraǵasy Paolo Rıchıottı.
P. Rıchıottıdiń aıtýynsha, «komanda qysqa merzimde jobany tabysty júzege asyrdy».
Onyń aıtýynsha, «Astana áýejaıyn damytý jobasy álemniń iri qalalarymen jalǵastyratyn basty baılanys jelisi - Orta Azııa óńiriniń aımaqtyq haby» bolyp tabylady.

Atap óterligi, Astana halyqaralyq áýejaıdyń jańa termınaly Memleket basshysynyń qatysýymen 31 mamyrda ashyldy .
Zamanýı úlgidegi jolaýshylar termınalynyń qurylysy 2014 jylǵy qarashada bastalyp, 2017 jyly mamyrda aıaqtaldy. Jańa termınaldyń aýmaǵy 47 myń sharshy metr, jylyna 8,2 mıllıon jolaýshyny ótkizedi. Jańa termınal eski áýejaıdyń ótkizý qabiletin 2,5 esege arttyrdy.