Astanadaǵy «aqyldy» aıaldamalarda kondıtsıonerler nege istemeıdi

ASTANA. QazAqparat – Elorda ákimdigi aptap ystyq kezinde «aqyldy» aıaldamalardaǵy salqyndatqysh jelileriniń ne úshin jumys istemeı turǵanyn túsindirdi, dep habarlaıdy QazAqparat tilshisi.

«Búginde elordada 164 «aqyldy» aıaldama bar. Olardyń qyzmetine aýdan ákimdikteri men merdiger kompanııalar jaýapty. Aýdan ákimdikteri usynǵan aqparatqa sáıkes, qazirgi ýaqytta «aqyldy» aıalmadalardaǵy kontsıonerler júıesin suıyqtyqpen qamtý jumysy júrip jatyr», - delingen qalalyq kólik jáne jol-kólik ınfraqurylymyn damytý basqarmasynyń «QazAqparattyń» resmı saýalyna bergen jaýabynda.

Sondaı-aq, avtobýstardaǵy salqyndatqyshtar jumysynyń baqylaýda ekenin málim etti.

«Kólikti baqylaý departamentiniń qyzmetkerleri elordanyń qoǵamdyq kólikterindegi kondıtsıoner júıeleriniń jumys isteýi barysyna turaqty túrde monıtorıng júrgizedi», - deıdi basqarmadan.

Eske salaıyq, osydan biraz kún buryn «QazAqparat» tilshileri elordadaǵy «aqyldy» aıaldamalardyń jaı-kúıin sholyp shyqqan edi. Qala boıynsha 10 «aqyldy» aıaldamadaǵy jaǵdaıdy baqylap kórdik. Onyń bireýinde ǵana aýa baptaǵysh jumys istep tur. Bul aıaldama Respýblıka dańǵyly men Kenesary kóshesiniń qıylysynda ornalasqan. Іshinde shaǵyn market bar, biraq jolaýshylarǵa oryn az, ıaǵnı aıaldama tar. Sol sebepti, jolaýshylardyń kóbi avtobýsty syrtta kútedi.