Astanadaǵy 5 synyp oqýshysy mektep foıesinde petarda jarǵan

ASTANA. QazAqparat – Qazaqstanda pırotehnıkalyq buıymdardy zańsyz ótkizýdiń 75 faktisi anyqtaldy, dep habarlaıdy QazAqparat tilshisi.

«Bıylǵy 26 jeltoqsandaǵy jaǵdaı boıynsha respýblıka boıynsha bazarlarǵa, dúkenderge jáne ózge de saýda oryndaryna, pırotehnıkalyq buıymdardy tasymaldaýdyń jáne saqtaýdyń zańdylyǵyn tekserý úshin 400 reıd júrgizildi. Nátıjesinde pırotehnıkalyq buıymdardy zańsyz satýdyń 75 faktisi anyqtaldy. Quqyq buzýshylardan sertıfıkattalmaǵan 1850 dana pırotehnıkalyq buıym tárkilendi», - dedi Ákimshilik polıtsııa komıtetiniń erekshe tapsyrmalar jónindegi aǵa ınspektory Ámirjan Baıǵoshev aptalyq brıfıngte.

Onyń aıtýynsha, jańa jyl merekesi qarsańynda qoǵamdyq qaýipsizdikti jáne quqyqtyq tártipti qamtamasyz etý úshin respýblıka aýmaǵynda 25 jeltoqsan men 3 qańtar aralyǵynda sertıfıkattalmaǵan pırotehnıkalyq buıymdardy zańsyz satý faktilerin anyqtaýǵa jáne jolyn kesýge arnalǵan «Pırotehnıka» jedel-profılaktıkalyq sharalary ótedi.

«Mysaly, 2022 jylǵy 13 jeltoqsanda Astanada «2GIS» qosymshasy arqyly pırotehnıkalyq buıymdardy satý týraly habarlandyrý tabyldy. Ony tekserý barysynda 183 dana sertıfıkattalmaǵan pırotehnıkalyq buıym tárkilendi. Ákimshilik quqyq buzýshylyq týraly kodekstiń 196-baby boıynsha ákimshilik jaýapkershilikke tartylǵan jáne aıyppul salyndy», - dedi spıker.

Sondaı-aq 20 jeltoqsanda Astana qalasyndaǵy №77 mektep-gımnazııasynyń 5-synyp oqýshysy B. mektep foıesinde petarda jarǵan. Tekserý nátıjesinde mektep janyndaǵy dúńgirshekten 10 qorap sertıfıkattalmaǵan pırotehnıkalyq buıym tabyldy, satýshy ákimshilik jaýapkershilikke tartylyp, aıyppul tólegen.

Foto: business-m.eu