Astanadaǵy 4 jerleý ornyna resmı mártebe beriledi

ASTANA. QazAqparat – Astanada 4 jerleý orny resmı mártebege ıe bolady, abattandyrylady jáne qorshalady. Olar – «Taldykól», «Bashan» jáne «Omar» zırattary. Bul týraly Nura aýdanynyń ákimi Júsip Jumaǵulov aıtty, dep habarlaıdy QazAqparat aýdan ákimi apparatynyń baspasóz qyzmetine silteme jasap.

«Jerleý oryndaryna resmı mártebe berýdiń mańyzdylyǵyn túsinemiz. Ata-babalardyń rýhyn qurmetteý – bizdiń mindetimiz. Kópjyldyq máseleni sheshý úshin tarıhı jerleýdiń naqty shekaralaryn anyqtaý protsesi bastaldy. Topografııalyq túsirilim bizge qandaı ýchaskelerdi qorshap, retke keltirý kerektigin túsinýge múmkindik beredi. Sondaı-aq, jyl sońyna deıin barlyq derekterdi jınaǵannan keıin jerleý oryndary resmı mártebege ıe bolady», - dedi Júsip Jumaǵulov.

Belsendiler men urpaqtardyń aıtýynsha, jerleýdi taný máselesi birneshe ondaǵan jyldar boıy kóterilip keledi.

«Aýmaqtardy abattandyrý jáne osy zırattarǵa mártebe berý máselesimen bizdiń aqsaqaldarymyz 20 jyldan astam ýaqyt aınalysyp keledi. Bul suraq ákemniń kózi tiri kezinde de alańdatqan. Aqyrynda, másele óziniń qısyndy qorytyndysyn tapty», - dedi bastamashyl toptyń múshesi Aqtaılaq Ybyraı.

Ólketanýshy Leonıd Semenovtyń zertteýleri arqasynda «Taldykól», «Bashan» jáne «Omar» jerleý oryndary týraly HH ǵasyrdyń basynan beri belgili.

Fading TSE qalalyq zertteý platformasynyń jetekshisi, zertteýshi-sáýletshi Temirtas Ysqaqovtyń aıtýynsha, bul qabirlerge jerleý kem degende 1890-1960 jyldar aralyǵynda bastalǵan. Biraq, 1960 jyldary úlken Taldykól kóliniń aǵyndy sýlardy jınaqtaýshy-býlandyrǵyshqa aınalýyna baılanysty aýyl turǵyndary qonystandy.

Aıta ketsek, «Taldykól» zıratynda jerlengen adamdardyń urpaqtary jerleý oryndaryn tazalady. Іs-sharaǵa Nura aýdany ákimdiginiń qyzmetkerleri de qatysty.