Astanadaǵy №3 jylý-elektr ortalyǵynyń quny 36 mlrd teńgege qymbattaǵan

ASTANA. QazAqparat – Reseı rýbliniń qubylýy Astanadaǵy №3 jylý-elektr ortalyǵynyń qunyn 36 mlrd teńgege qymbattatqan. Elordanyń Jylý-energetıka kesheni jáne kommýnaldyq sharýashylyq basqarmasynyń basshysy Marsel Uzaqov máslıhat depýtattarynyń suraǵyna bergen jaýabynda osylaı dedi, dep habarlaıdy QazAqparat tilshisi.

«№3 jylý-elektr ortalyǵynyń quny 36 mlrd teńgege qymbattaǵanyn aıtyp otyrsyz. 36 mlrd teńge degen 1200 oryndyq 10 mektep salýǵa jetetin aqsha. 10 jyldan beri salyp jatqanymyz az bolǵandaı taǵy 36 mlrd teńge jumsamaqshymyz. Nege bulaı bolyp jatyr?», - dep surady máslıhat depýtaty Talǵat Erǵalıev.

Basqarma basshysynyń aıtýynsha, qurylystyń qymbattaýyna teńge baǵamynyń qubylmalylyǵy sebepker bolǵan.

«Reseı rýbliniń qalaı qubylǵanyn bilesizder. Onyń áseri bizge de tıip jatyr. Valıýta baǵamynyń kesirinen joba 43 paıyzǵa qymbattady. Áýelde, umytpasam, tipti 52 mlrd teńgege deıin qymbattaǵan. Keıin ony 36 mlrd teńgege deıin túsirdik. Endi taǵy túzetý ázirlep jatyrmyz. 36 mlrd teńgeden de azaıatyn shyǵar. Bul baǵa jobaǵa salynǵan qondyrǵynyń qazirgi naqty baǵasynan týyndap otyr. Biz ony óndiretin zaýytqa baǵasyn túsirte almaımyz», - dedi Marsel Uzaqov.