Astanadaǵy 2000 jylǵa deıin salynǵan mektepter energııa únemdeıtin tehnologııamen jabdyqtalady

ASTANA. QazAqparat – Astanadaǵy 2000 jylǵa deıin salynǵan mektepter energııa únemdeıtin tehnologııalarmen jabdyqtalady. Qalalyq bilim basqarmasynyń basshysy Qasymhan Senǵazyev óńirlik kommýnıkatsııalar qyzmetinde ótken brıfıngide osyndaı málimet berdi, dep habarlaıdy QazAqparat tilshisi.

«Bilim berýdegi serpindi jobalardyń biri 2000 jylǵa deıin salynǵan jalpy bilim beretin mektepterdiń ǵımarattaryn jóndeý jobasy bolady dep oılaımyn.

Mektep ǵımarattaryn jóndeýdegi basty mindet – qabyrǵalardy jańartý ǵana emes, zamanaýı talaptarǵa saı keletin jaıly, tıimdi, tehnologııalyq jetildirilgen keńistik qurý.

Bilim berý uıymdarynyń ǵımarattaryn kúrdeli jóndeý zamanaýı energııa únemdeıtin tehnologııalarmen jabdyqtalatyn bolady. Bul eski ınjenerlik jabdyqty jańasyna aýystyryp qana qoımaı, ǵımarattyń syrtqy kelbetin ózgertýge múmkindik beredi.

Sonymen qatar, tek oqý kabınetteri ǵana emes, joba aıasynda zamanaýı keń kitaphana, foıe men dálizder, sport zal jáne akt zaldary men mektep ashanasy da jańartylady», - dedi ol.

Onyń málimeti boıynsha, 2029 jylǵa qaraı qaladaǵy mektepterdiń bári zamanaýı kabınettermen jabdyqtalmaq.

«2029 jylǵa deıin materıaldyq-tehnıkalyq bazany nyǵaıtý úshin 58 bilim berý uıymynda kúrdeli jóndeý, 105 bilim berý nysanynda aǵymdaǵy jóndeý jumystary júrgiziledi. Sondaı-aq, 302 robototehnıka, hımııa, fızıka, bıologııa, STEM pán kabınetteri alynady. 2029 jylǵa qaraı barlyq mektepter zamanaýı kabınettermen jabdyqtalady», - dedi Qasymhan Senǵazyev.