Astanadaǵy jalǵyz mıneralogııalyq murajaıda qandaı sırek mıneraldar saqtaýly
Mýzeıdiń negizin qalaýshy, Qazaqstannyń eńbek sińirgen geology Oljabaı Ismaılov salada jarty ǵasyrdan beri eńbek etip keledi. Eldiń mıneraldy-shıkizat bazasyn geologııalyq zertteýge jáne nyǵaıtý jolynda jeke úles qosýdan qashqan emes.
Murajaı qazaqstandyqtarǵa, týrısterge, sheteldik qonaqtarǵa Qazaqstannyń jer asty baılyǵy týraly mol maǵlumat berý úshin qurylǵan.
«Mamandyǵym geolog jáne bar ómirimdi osy salaǵa arnap kelemin. Astanada mıneralogııalyq murajaı ashýǵa bel býǵanym da osy mamandyqqa degen mahabbattyń belgisi. Buryn Almatyda mıneraldar murajaıy bolǵan, qazir joq. Sondyqtan balalar bizge keledi. Bizdiń murajaıdyń maqsaty — elimizdiń tabıǵı resýrstaryn dáripteý jáne balalardyń boıyndaǵy óz eline degen súıispenshilik pen maqtanyshty qalyptastyrý. Sebebi, bizde Mendeleev kestesiniń barlyq derlik elementterin tabýǵa bolady», - deıdi Qazaqstannyń eńbek sińirgen geology Oljabaı Ismaılov.
Murajaı kollektsııasynda Qazaqstan aýmaǵynda, sondaı-aq kórshiles elderde, álemniń ár túkpirinde —Eýropa, Afrıka, Ońtústik Amerıka, Avstralııada jınalǵan eksponattar usynylǵan. Kollektsııalyq úlgilerdiń bir bóligin jergilikti geologtar tegin syıǵa tartypty.
Murajaı qory únemi jańartylyp, jańa túsimdermen tolyqtyrylyp otyrady. Sońǵy jyldary kollektsııalardyń ǵylymı, sonymen qatar estetıkalyq qundylyǵyna erekshe nazar aýdarylyp jatqanyn atap ótken jón.