Astanadaǵy sammıtte jahandyq damýdyń jańa modeli usynyldy — ózbek sarapshysy
«Tóraǵalyq Qazaqstanǵa ótken ýaqytta Prezıdent Qasym-Jomart Toqaev ShYU jahandyq ózgerister kezinde damýdyń jańa tártibi men negizin qalyptastyrýǵa baǵyttalǵan bastamalardy kóteretin uıymǵa aınalýy tıis ekenin málimdegen edi. Sodan bastap Qazaqstannyń jetekshiligimen „Ádil álem, kelisim jáne damý jolyndaǵy jahandyq birlik týraly“ dep atalatyn óte mańyzdy qujat ázirlendi. Onda búginde barsha adamzatty alańdatqan máselelerge qatysty ShYU-nyń kózqarasy men sheshý joldary baıandalǵan. Atap aıtqanda, qujatta qaýipsizdik, ádil ári jańa álemdik tártipti ornatýdyń alǵysharttary, neokolonıalızm júıesinen tolyq arylý problemalary qamtyldy. Ony ShYU-ǵa múshe elderdiń barlyǵy qoldaıdy», — dedi sarapshy.
Sonymen qatar, Bahtıer Ergashev Memleket basshysy Qasym-Jomart Toqaev kótergen ShYU aıasyndaǵy iri ekonomıkalyq jobalardy birlesip iske asyrý usynysyna erekshe toqtaldy.
Onyń paıymynsha, uıymǵa múshe elderdiń qaýipsizdik máselesinen bólek, ekonomıkalyq yntymaqtastyqty nyǵaıtý nıeti qarqyndy damýǵa jol ashady.
ShYU-ǵa álemniń eń iri ekonomıkasy sanalatyn Reseı, Úndistan, Qytaı sııaqty úsh memleket múshe.
Sonymen qatar, uıymnyń quramynda Pákistan men Iran syndy óte yqpaldy aımaqtyq derjavalar bar.
Sondyqtan sarapshynyń oıy osy múmkindikti tıimdi paıdalana otyryp, ShYU-nyń bedeli men salmaǵyn arttyra túsý mańyzdy degenge saıady.
«Astanadaǵy sammıt barysynda álemdik qaýymdastyqqa jahandyq damýdyń jańa modeli usynyldy. Sonymen qatar, ShYU-nyń qyzmeti Eýrazııa keńistigindegi ekonomıkalyq jáne ınvestıtsııalyq ózara is-qımyldyń jańa arhıtektýrasyn qalyptastyrýǵa baǵyttalǵan. Ol qandaı bir bloktyq uıymǵa qarsy qoldanylmaıdy, kerisinshe ádil álemdik tártip ornatý úshin jumys istep kele jatqan birlestik», — dep pikir bildirdi Bahtıer Ergashev.
Saıasattanýshy atap ótkendeı, qazirgi ýaqytta batys elderiniń jahandyq tártip ornatýdaǵy yqpaldy dáýiri aıaqtalyp keledi. Sondyqtan álemdi ádildikke úndeıtin, damý jolynda zaman talabyna saı renk beretin prıntsıpter qajet.
Bul oraıda ShYU osy mıssııalardy abyroımen atqaryp keledi. Bahtıer Ergashev onyń ishinde Qazaqstannyń tóraǵalyǵy uıymnyń keıbir baǵyttar boıynsha turalap jumysyn jandandyra túskenin atap ótti.
«ShYU álemdik arenaǵa batyl bastamalarmen shyǵýy tıis. Oǵan uıymnyń qaýqary jetedi, óıtkeni búginge deıin túrli damý satysynan ótip, jetildi. Aldaǵy ýaqytta ShYU jahandyq jańa tártipti ornatatyn birlestikke aınalaryna senim mol», — dep túıindedi Bahtıer Ergashev.
Eske salsaq, búgin Astanada Shanhaı yntymaqtastyq uıymyna múshe memleket basshylarynyń keńesi ótip, onyń barysynda 25 mańyzdy qujatqa qol qoıyldy.