Astanadaǵy sambodan álem chempıonatyna 85 el qatysady

<p>ASTANA. KAZINFORM &ndash; 8-10 qarashada Astanadaǵy Jaqsylyq Úshkempirov atyndaǵy jekpe-jek saraıynda jaýyngerlik, sporttyq jáne zaǵıptar arasynda sambodan álem chempıonaty ótedi. Osy is-sharaǵa 85 elden sportshylar qatysady. Bul týraly Ortalyq kommýnıkatsııalar qyzmetindegi baspasóz máslıhatyda málim boldy.</p>

«Álem chempıonatyna qatysýǵa 85 memleketten 600-den astam sportshy ótinim berdi. Sonymen qatar, bul elderden 150-ge jýyq bapker keledi. Álemge tanymal sportshylar da shaqyrtý aldy, ıaǵnı Fedor Emelıanenko elordada qonaǵymyz bolady», - dedi Qazaqstan sambo federatsııasynyń birinshi vıtse-prezıdenti Manarbek Bısekenov.

Jarysta erler sporttyq sambodan 58,64,71,79,88,98,+98 keli salmaqta, áıelder 50,54,59,65,72,80+80 keli salmaqta beldesedi. Al jaýyngerlik sambodan erler 58,64,71,79,88,98,+98 keli salmaq dárejesinde, áıelder 50,54,59,65,72,80+80 keli salmaq dárejesinde baqtaryn synaıdy. Zaǵıp jandar 3 salmaqta, ıaǵnı 64,79,98 keli salmaq dárejesinde kúresedi. Jeńimpazdarǵa medal, dıplomdardan bólek aqshalaı syılyqtar tabystalady.

«Osy dodaǵa 311 myń AQSh dollary somasynda aqshalaı syılyq tigiledi. Birinshi oryn alǵan sportshylarǵa 4 myń dollar, ekinshi orynǵa – 3 myń dollar, úshinshi oryn alǵan eki sportshyǵa 2 myń dollardan beriledi», - dedi M. Bısekenov.

Ulttyq qurama komandanyń bas bapkeri Birjan Imahanov chempıonatqa qatysatyn sportshylardyń daıyndyǵy joǵary deńgeıde ekenin jetkizip, bundaı jarystardy elimizde ótkizý úlken mártebe ekenin aıtty.

«Álem chempıonatyna qatysatyn sportshylar 24 qazannan beri elordada oqý-jattyǵý jıynyn bastap ketti. Qazaqstannan 28 sportshy el namysyn qorǵaıdy. Jalpy, álem chempıonatynyń Qazaqstanda ótýi úlken jaýapkershilik jáne úlken mártebe. Onymen qosa, osyndaı chempıonattar memleketimizdiń týrızm salasynyń damýyna oń áserin beredi dep oılaımyn. Samboshylarymyz dodada qarsylastarymen tájirbıe almasyp, jańa deńgeıge bir saty ósetin bolady», - dedi B. Imahanov.

Óz kezeginde Qazaqstan sambo federatsııasynyń bas hatshysy Ernazar Beksultanov federatsııada tirkelgen 43 myńǵa jýyq sportshy bar ekenin aıtty.

«Bizdiń sportshylar aldaǵy álem chempıonatynda da eselerin jibermeı, boz kilemde baryn salyp, altyn medaldy qorjynǵa salady degen úmit bar. Federatsııa jyl saıyn sambodan Qazaqstan Respýblıkasy chempıonatyn ótkizip keledi. Keler jyly klýbtyq sıstemany damytyp, jastar, jasóspirimder jáne kadetter sanyn kóbeıtý, kishkentaı búldirshinderdi sportqa baýlý jospary bar», - dedi E. Beksultanov.

Eske salsaq, bıyl maýsym aıynda qazaqstandyq samboshylar Azııa chempıonatynda 15 altyn aldy.