Astanadaǵy reıd: veıp pen nasybaı áýesqoılary jaýapkershilikke tartylyp jatyr

<p>ASTANA. KAZINFORM &ndash; Elordanyń barlyq aýdanynda 18 naýryzdan bastap veıp pen nasvaıdyń zańsyz taralýy men qoldanylýyn anyqtaý boıynsha reıdter júrgizilýde. Reıdtik is-sharalardyń 2 aptasynda 700-den astam saýda núkteleri tekserildi, shekpeıtin temeki ónimderin, onyń ishinde nasybaı óndirisi boıynsha jerasty tsehtaryn satýdyń 150-ge jýyq faktisi anyqtaldy, dep habarlaıdy elorda ákimdiginiń resmı saıty.</p>

Polıtseıler aýdan ákimdikteriniń qyzmetkerlerimen birlesip, saýda núktelerin tekseredi jáne taratýshylardy ákimshilik jaýapkershilikke tartady. Almaty aýdanyndaǵy reıd barysynda polıtseıler 51 faktini anyqtady, onyń ishinde shekpeıtin temeki ónimderin satýdyń 40 faktisi (nasvaı) tirkeldi. Barlyq faktiler boıynsha QR ÁQBtK-niń 196-baby boıynsha 25 AEK mólsherinde aıyppul túrinde ákimshilik jaza qoldanyla otyryp, ákimshilik hattamalar jasaldy.

Mekemelerde temeki ónimderin (kalıan) tutynýdyń 11 faktisi, QR ÁQBtK-niń 441-baby boıynsha ákimshilik hattamalar jasaldy, 15 AEK mólsherinde aıyppul túrinde ákimshilik jaza qoldanyldy.

Sondaı-aq Saryarqa aýdanynda saýda oryndarynda jedel-aldyn alý sharalary júrgizilýde. Reıd bastalǵannan beri 50 buzýshylyq anyqtalyp, 30 kelige jýyq nasvaı tárkilendi.

Esil aýdanynda jedel-profılaktıkalyq is-sharalar barysynda shekpeıtin temeki ónimderin satýdyń 11 faktisi anyqtaldy, onyń ishinde nasvaı saýdasy úshin 7 fakt jáne kámeletke tolmaǵan tulǵalarǵa veıpterdi satýdyń 4 faktisi tirkeldi.

Polıtsııa qyzmetkerleri kásipkerlerge qatysty QR ÁQBtK 196-baby men 423-baby 1-bóliginiń 1-bóligine sáıkes, 25 AEK (92300 teńge) somasyna aıyppul túrinde ákimshilik sharalar qabyldady. Esterińizge sala keteıik, Astanada 4 tonna nasvaı tárkilendi, onyń quny 20 mln teńgeden asady.

Tárkilengen barlyq ónim joıyldy. Elordanyń saýda núkteleri boıynsha reıdter kún saıyn júrgiziledi.