Astanadaǵy qonaq úıdiń basseıninde jaraqat alǵan áıelge ótemaqy tólenedi

<p>ASTANA. KAZINFORM &ndash; Astana qalasynyń azamattyq ister jónindegi aýdanaralyq sotyna júgingen áıel elordadaǵy iri JShS-ne (qonaq úı) qatysty aryz túsirip, joǵaltqan tabysyn, materıaldyq shyǵyndy óndirý jáne moraldyq zııandy óteý týraly talap qoıǵan. Aqyry ol 1 mln 310 myń teńge ótemaqyny óndirip aldy.</p>

Basseınniń jumysyn qonaqúı qyzmetterin kórsetetin JShS júzege asyratynyn atap ótken jón.
Qonaq úı basseıninde jaraqat alǵan áıeldiń san súıegi synǵan. Ol jaraqat alǵan sátten bastap, uzaq ýaqyt emdelgen. Oǵan ýaqytsha eńbekke jaramsyzdyq paraǵy ashylǵan.

QR ST 2985-2017 «Haýyz qyzmetteri» halyqqa qyzmet kórsetýdiń ulttyq standartynda basseın qyzmetterin kórsetý kezinde kelýshilerdiń ómiri men densaýlyǵynyń qaýipsizdigi jáne olardyń múlkiniń saqtalýy qamtamasyz etilýi tıis. 

Olardaǵy tutynýshylardyń ómiri men densaýlyǵyna qaýip deńgeıi eń az bolýy kerek. Qyzmetter qaýipsizdik sharalaryna saı bolýǵa tıis. Basseınge barý jáne ondaǵy minez-qulyq erejelerine sáıkes ákimshilik minez-qulyq erejelerin buzǵan adamdardy basseınge barýdan aıyrýǵa quqyly.
Sotta anyqtalǵandaı, talap qoıýshy basseın aımaǵyna arnaıy rezeńke aıaq kıimsiz kirgizilgen, saldarynan taıyp qulap, dene jaraqatyn alǵan.

«Bul jaýapker kórsetken qyzmet sapasynyń tómen ekenin kórsetedi. Sonyń saldarynan onyń densaýlyǵyna zııan kelgen. Alaıda, sot zalal somasyn azaıtý qajet dep sanady. Óıtkeni, bul talap qoıýshynyń basseın aýmaǵynda taıǵanamaıtyn aıaq kıim kııýge qatysty óreskel nemquraılylyǵy dep tanylǵan, ondaı aıaq kıim kııý kerek ekeni erejede kózdelmegen. Bul oqıǵa erejege sáıkes kelýshilerde arnaıy rezeńke aıaq kıim bolýyn talap etetin basseın aımaǵynda bolǵan. Osylaısha, talap qoıýshy basseındi paıdalaný erejesin buzǵan. Demek, erejelerdi elemeı, zalal keltirýge yqpal etip, talap qoıýshynyń óziniń óreskel nemquraılylyǵy oryn alǵan», - delingen Joǵary sot taratqan resmı aqparatta.

Belgilengennen parasattylyq pen ádildik ólshemsharttaryn basshylyqqa ala otyryp, sot materıaldyq zalaldy óteý mólsherin talap qoıýshynyń kinásiniń dárejesine teń qylyp azaıtqan.

Talap qoıý ishinara qanaǵattandyryldy: JShS-nen talap qoıýshynyń paıdasyna 1,1 mln teńge joǵalǵan tabys jáne 160 myń teńgeden astam dári-dármek jáne áýe bıletin satyp alýǵa ketken shyǵyn óndirildi.

Jaýapkerdiń qyzmet kórsetý kezinde talap qoıýshynyń densaýlyǵyna zııan keltirýdegi kinási ishinara dep tanylǵandyqtan, 50 myń teńge moraldyq zııandy óteý týraly talap ishinara qanaǵattandyryldy.

Sheshim zańdy kúshine engen joq.