Astanadaǵy hostelderde órtke qarsy reıd júrgizildi
Qystyń alǵash kúninde Astana qalasynyń polıtsııa jáne tótenshe jaǵdaılar departamentteriniń qyzmetkerleri Amanat partııasynyń eriktilerimen birge Almaty aýdanyndaǵy jeke turǵyn úı massıvin, jataqhanalar men hostelderdi, barak tıpindegi jaldamaly baspanalardy, saıajaı sektoryn aralap, órt qaýipsizdigi jóninde túsindirý jumystaryn júrgizdi.
Tótenshe jaǵdaılar departamentiniń deregi boıynsha, búgingi tańda Astana qalasy boıynsha resmı túrde 229 qonaq úı men 80 hostel jumys isteıdi.
«Búgin Almaty aýdanyndaǵy 20 hosteldi araladyq. Negizi Astana qalasy ákimdiginiń resmı málimeti boıynsha, qalada 80 hostel bar. Jalpy qalada jalǵa beriletin úı óte kóp. Sondyqtan biz polıtsııamen birlesip, osyndaı sharalar ótkizemiz», - deıdi Astana qalasy tótenshe jaǵdaılar departamenti memlekettik órt baqylaý basqarmasy bastyǵynyń mindetin atqarýshy Madııar Myrzageldıev.
Onyń sózinshe, jylytý maýsymy bastalǵannan beri «Jataqhana» jedel-aldyn alý is-sharasy aıasynda baspana retinde jalǵa berilgen 257 nysandy aralaý jumystary júrgizilgen.
Jalpy jyl basynan beri Astana qalasynyń aýmaǵynda 549 órt tirkelgen. Onyń ishinde turǵyn úı sektorynda 223 órt bolǵan. Turǵyn úı sektoryndaǵy órtterden jyl basynan beri 12 adam qaza tapqan. 27 adam túrli dárejedegi jaraqattar alsa, 38 adam tútinge ýlanǵan.
Aýla aralaý kezinde polıtsııa ókilderi men tótenshe jaǵdaı qyzmetiniń mamandary jataqhana jáne basqa da kommertsııalyq qyzmet úshin paıdalanylatyn turǵyn úılerge erekshe nazar aýdardy.