Astanadaǵy halyqaralyq kórme: esepke qoıylǵan qazaqy tazylar artyp keledi

<p>ASTANA. KAZINFORM &ndash; Búgin elordada &laquo;Esil tańy &ndash; 2024&raquo; atty túrli ıt tuqymdarynyń kezekti halyqaralyq kórmesi ótti. Kórme aıasynda Qazaqstan kınologtary odaǵy qazaqy tazynyń kórmesin uıymdastyrdy.</p>

Sondaı-aq, kórme aıasynda geneologııalyq turǵyda tuqymy beımálim ıtter tekserýden ótkizilip, arnaıy ólshemderi jasalyp, sonyń nátıjesinde ıesine ıtiniń bastapqy shyqqan tuqymyna qatysty halyqaralyq úlgide sıpattama beriledi. Halyqaralyq kórmege elimizden jáne kórshiles memleketterden 250-ge jýyq ıt jetkizildi.

Foto: Soltan Jeksenbekov/ Kazinform

Qazaqstan kınologtary odaǵynyń prezıdenti Baýyrjan Serikqalıdiń aıtýynsha, tazylardyń kórmesinde Astana men jaqyn oblystardan 30-ǵa jýyq tazy saıysqa túsip jatyr. Kórmeniń basty maqsaty - tazylardyń ishinen eń úzdik qumaıdy tańdaý. Kórme Qazaqy tazy tuqymynyń tanymaldyǵyn arttyrý úshin uıymdastyrylyp otyr. Sol arqyly jergilikti asyl tuqymdy ıtterdi halyqaralyq deńgeıde tanytýǵa, Qazaqstannyń ulttyq murasy men mádenıetin ilgeriletýge mańyzdy qadam jasalady.

Foto: Soltan Jeksenbekov/ Kazinform

«Osyndaı is-sharalar nátıjesinde tıisti qujaty joq tazylardy esepke alý júzege asyrylady. Qazir kóp tazyny ákelip jatyr. Solardyń arasynan standartqa saı ıtterdi iriktep, tıisti ólshemdi jasap, sıpattamasy bar qujatty beremiz. Jalpy, aýyldarda qujaty joq tazylar barshylyq. Sondyqtan eldi mekenderge baryp, osy stardartqa sáıkes keletinderin esepke alyp jatyrmyz. Osy oraıda elimizde naǵyz tazylardyń sany ósip keledi», - dedi B. Serikqalı Kazinform tilshisine bergen suhbatynda.

Foto: Soltan Jeksenbekov/ Kazinform

Іs-shara barysynda mamandar bekitilgen standart boıynsha árbir ıttiń bıiktigine, qulaǵynyń uzyndyǵyna, salmaǵyna qarap, talapqa tolyq saı kelgenderine jaqsy baǵa berdi.

Osyǵan deıin Qazaqstan kınologtar odaǵy elimizdegi tazy sany 3 000-nan asatynyn habarlaǵan edi.

Búgingi tazylar kórmesine elordalyq Marat Semenov óziniń tórt tazysyn alyp kelgen. Onyń eki jasar Arlan atty tazysy búgingi kórmede júldeger atandy.

Foto: Soltan Jeksenbekov/ Kazinform

«Basty maqsat – selektsııa. Naqty standarqa sáıkes kelý mańyzdy. Elimizdiń aýmaǵynda osy standartqa nazar aýdarýymyz kerek. Tazy tuqymyn kóbeıtýdiń mańyzy joǵary. Ótken ǵasyrdaǵy asharshylyq kezinde meniń atam óziniń jeti tazysymen aýylyndaǵy jáne kórshi eldi mekenderdegi biraz halyqty aman alyp qalǵan. Qazir tazy ósirýge qyzyǵyp otyrǵan jastar kóbeıip keledi. Olar bul salada kásibı kınologtardan tálim alýy kerek. Búgingideı halyqaralyq kórmelerge jıi qatysýy tıis», - dedi M. Semenov.