Astanadaǵy bilim berý uıymdarynda býllıngke qarsy baǵdarlama iske qosyldy

<p>ASTANA. KAZINFORM &ndash; Astananyń bes aýdanynda oqýshylarǵa, ata-analarǵa tegin psıhologııalyq-konsýltatsııalyq kómek kórsetý kabınetteri ashyldy. Bul týraly Kommýnıkatsııalar qyzmetinde ótken brıfıngte Astana qalasy bilim basqarmasynyń basshysy Qasymhan Senǵazyev aıtyp berdi. Bul týraly elorda ákimdiginiń resmı saıty jazdy.</p>

Kabınetter Qalanyń ádistemelik ortalyǵy, «Ustazdar úıi», №22, №54, №88 mektepter bazasynda quryldy.

«2024 jyldyń basynan bastap 336 bala men 377 ata-ana keńes aldy. Qazirgi ýaqytta qalalyq psıhologııalyq qoldaý ortalyǵyn ashý jumystary júrgizilýde. Ortalyq bazasynda dıagnostıkalyq, túzetý-damytý, konsýltatsııalyq, psıhoprofılaktıkalyq qyzmetter júzege asyrylatyn bolady», - dedi vedomstvo basshysy.

Qazirgi ýaqytta elordanyń bilim berý uıymdarynda býllıngke qarsy baǵdarlama iske asyrylyp jatyr. Ol úshin pılottyq jobaǵa 5 mektep (Almaty aýdanynyń №72 mektebi, Baıqońyr aýdanynyń №16 mektebi, Nura aýdanynyń №79 mektebi, Esil aýdanynyń №24 mektebi, Saryarqa aýdanynyń №6 mektebi) engizildi.

«Osy baǵdarlama aıasynda qorqytýdyń aldyn alý jáne azaıtý, býllıngtiń anyqtalǵan jaǵdaılaryn sheshý boıynsha is-sharalar júrgiziletin bolady. Sondaı-aq muǵalimderdi oqýshylardyń jaı-kúıiniń dárejesin anyqtaý daǵdylaryna oqytý josparlanyp otyr. Elordanyń bes mektebinde oqýshylar arasynda qorqytýdyń aldyn alý maqsatynda (№ 4, 24, 25, 72, 74) pılottyq rejımde Oqý-aǵartý mınıstrliginiń «DosbolLike» baǵdarlamasy iske asyrylyp jatyr», - dedi Qasymhan Senǵazyev.