Astana áýejaıynda ushaqtardyń kesh kelýine baılanysty 3 reıstiń ýaqyty aýysty

<p>Elorda áýejaıynyń áýe aılaǵynda jaǵdaı turaqty. Tek ushaqtyń kesh kelýine baılanysty 3 reıstiń ýaqyty ózgerdi. Bul týraly Astana halyqaralyq áýejaıynyń baspasóz qyzmeti málimdedi, dep habarlaıdy <a href="Kazinform" target="_blank" rel="noopener">Kazinform.</a></p>

«Astanada kún raıy turaqtalyp, ushýǵa qolaıly bolyp tur. Búgin aýa raıyna baılanysty reıster toqtatylǵan joq. Qazir áýe aılaqta jeldiń jyldamdyǵy – 6 m/s, aýa temperatýrasy – 18°C. Búgin elorda áýejaıynda ushýǵa 74 reıs josparlanǵan bolatyn. Onyń 3-eýi ushaqtyń kesh kelýine baılanysty keshiktirilýde», - dep jazdy baspasóz qyzmeti.

Aıta keteıik, keshe Astanada qolaısyz aýa raıyna baılanysty keıbir reıster kestesi ózgergen edi. Áýe aılaq qyzmeti 14:00-20:00 aralyǵynda jeldiń jyldamdyǵy 22 m/s-dan 27 m/s deıin jetýi múmkindigi týraly habarlama aldy.

Keshe elorda áýejaıynda 75 reıs josparlanǵan bolatyn. Onyń 12 reısi (4 ushatyn, 8 ushyp keletin) ushaqtyń kesh kelýine baılanysty keshikti. Elordadaǵy qolaısyz aýa raıyna baılanysty IQ389 Astana-Jezqazǵan baǵytynda ushatyn reıs toqtatyldy.