Astanada jyl sońyna deıin 2 510 páterdiń qurylysy aıaqtalady

ASTANA. QazAqparat - Astanada Qazaqstan Respýblıkasyndaǵy 2008-2010 jyldarǵa arnalǵan turǵyn úı qurylysyn damytý memlekettik baǵdarlamasyn júzege asyrý aýqymynda qazirgi kezde jalpy kólemi 261,5 myń sharshy metr 5 674 páterdiń qurylysy aıaqtaldy. Bul týraly elorda ákimdiginiń baspasóz qyzmeti habarlady.

«Kórsetilgen baǵdarlama boıynsha barlyǵy 413,1 myń sharshy metrlik 8184 páter kózdelgen. Memlekettik baǵdarlamanyń ekinshi kezeńi boıynsha turǵyn úı qurylysy myna turǵyn úı keshenderinde júrgizilýde: Saraıshyq kóshesinen ońtústikke qaraı TK-de, M.Jumabaev dańǵylynan shyǵysqa qaraı jáne N.Tilendıev dańǵylynan ońtústikke qaraı Sarybulaq ózeniniń boıyndaǵy TK-de. 2014 jyldyń sońyna deıin jalpy aýdany 151,6 myń sharshy metrlik 2 510 páterdiń qurylysyn aıaqtaý josparlanýda», - delingen habarlamada.

Josparlanǵan memlekettik qarjylandyrý kólemine sáıkes Astana qalasy ákimdiginiń 2020 jylǵa deıingi baǵyttarynyń turǵyn úılerdi paıdalaný boljamy 44 800 páterdi nemese 2 mln. 354 myń sharshy metrdi quraıdy: onyń ishinde turǵynúıqurylys salymdary júıesi arqyly 304,0 myń sharshy metrlik 5 183 páter; kezektegiler úshin jalǵa beriletin - 183,0 myń sharshy metrlik 3580 páter; jas otbasylary úshin jalǵa beriletin turǵyn úıler - 132,0 myń sharshy metrlik 2 778 páter; «QIK» AQ qory arqyly - 290,9 myń sharshy metrlik 5820 páter; apattyq úılerdi buzý boıynsha ilki joba boıynsha - 1 037 myń sharshy metrlik 20 402 páter; «Samuryq-Qazyna» jyljymaıtyn múlik qory arqyly - 407,3 myń sharshymetrlik 7 118 páter.

«Budan buryn habarlanǵandaı, 2014 jyly Baǵdarlamany júzege asyrý aýqymynda Turǵynúıjınaqbanki jelisi boıynsha 7 turǵyn úı kesheninde jalpy aýmaǵy 86,5 myń sharshy metrlik 1 664 páterdiń qurylysy júrgizilýde, onyń ishinde aǵymdaǵy jyly nysandardyń daıyndyǵy eskerile otyryp, 4 JTK-de jalpy kólemi 52,0 myń sharshy metrlik 914 páterdi paıdalanýǵa berý josparlanýda», dep habarlady baspasóz qyzmeti.