Astanada jyl basynan beri 430 kólik júrgizýshi jol qozǵalysy erejelerin buzǵan

NUR-SULTAN. QazAqparat – Astana joldarynda qozǵalys erejelerin buzǵan 430 kólik júrgizýshi rólge alkogoldik ishimdik iship otyrǵan, dep habarlaıdy QazAqparat Nur-Sultan qalalyq PD baspasóz qyzmetine silteme jasap.

«Elordada jyl basynan beri 40 myńǵa jýyq JQE buzýshylyq anyqtaldy, onyń ishinde 430 júrgizýshi mas kúıinde bolǵan. Kommýnaldyq turaqqa 1 332 avtokólik ornalastyryldy. Mas kúıinde basqarý quqyǵynan aıyrylǵan kólik quralyn júrgizgeni úshin QR QK 346-baby boıynsha 44 júrgizýshi jaýapkershilikke tartyldy», - delingen departament taratqan baspasóz málimdemesinde.

Belgili bolǵanyndaı, jol qozǵalysy erejelerin buzǵandar arasynda kólik júrgizý quqyǵynan aıyrylǵandar da bar.

«30 maýsym kúni saǵat 4:20-da Nur-Sultan qalasy PD mamandandyrylǵan patrýldik polıtsııa batalonynyń qyzmetkerleri Qonaev kóshesi men Máńgilik El dańǵylynyń qıylysynda «Nissan Almera» markaly avtokóligin toqtatty. 23 jastaǵy júrgizýshiniń qujattaryn tekserý kezinde alkogoldiń ıisi shyqqan. Medıtsınalyq kýálandyrý nátıjeleri boıynsha jeńil dárejedegi alkogoldik masańdyq anyqtaldy. Júrgizýshiniń osy jylǵy mamyrda avtokólik quralyn basqarý quqyǵynan aıyrylǵany belgili boldy. Tártip buzýshyǵa qatysty QR QK 346-baby «Kólik quraldaryn basqarý quqyǵynan aıyrylǵan jáne alkogoldik masań kúıdegi adamnyń kólik quralyn basqarýy» boıynsha sotqa deıingi tergeý bastaldy», - dep málimdeıdi departamentten.

Tártip buzýshy Nur-Sultan qalalyq PD ýaqytsha ustaý ızolıatoryna qamalyp, avtokólik kommýnaldyq turaqqa qoıylǵan.