Astanada jyl basynan beri 41 myń tonnadan astam qoqys joıyldy

ASTANA. QazAqparat - Elordada stıhııalyq qoqys úıindilerin joıý jumysy turaqty negizde júrip jatyr. Jyl basynan beri qalanyń bes aýdanynda 41 myń tonnadan astam qoqys jınalyp, polıgondarǵa shyǵaryldy, dep habarlaıdy QazAqparat Astana ákimdiginiń resmı saıtyna silteme jasap.

Elordanyń árbir aýdanynda ruqsat etilmegen qoqys úıindileri paıda bolmas úshin kúndelikti monıtorıng júrgiziledi, sol sııaqty jergilikti oryndarda olardy joıý boıynsha jedel jumys júrgiziledi. Oǵan 100-ge jýyq arnaıy tehnıka jumyldyrylǵan. Jyl basynan beri qala boıynsha 74 stıhııalyq polıgon anyqtaldy, olardyń basym bóligi joıyldy.

Baıqońyr aýdanynda monıtorıng arqyly 8 mekenjaı boıynsha ruqsat etilmegen 9 oryn anyqtaldy. Olardyń segizi joıyldy, bireýi joıý boıynsha jumys jalǵasýda. Qoqystar «Severnaıa Grıada» men «Eko-Polıgon» qurylys qaldyqtary polıgondaryna shyǵaryldy.

Almaty aýdanynda 9 ýchaskede anyqtalǵan 39 orynnyń 25-i joıyldy. Aýmaqty baqylaý úshin 4 mekenjaı boıynsha beınebaqylaý kameralary ornatylady:

1) J.Nájimedenov kóshesi, 39;

2) Sh.Qaldaıaqov kóshesi, 58;

3) J.Nájimedenov kóshesi, 62;

4) J.Nájimedenov - A.Baıtursynov kósheleriniń arasyndaǵy aýmaq.

Esil jáne Nura aýdandarynda «Nurly jol» vokzalyna qaraı Uly Dala dańǵylyndaǵy qoqystardy joıý jumysy júrip jatyr. Bul oryndaǵy jumystyń 80%-ǵa jýyǵy, «Jetisý» TK aýdanynda – 20%-ǵa jýyǵy, «Zarechnyı» eldi mekeni aýmaǵyndaǵy «Baqyt Premıým» TK aýdanynda-100%, sol sııaqty «Prıgorodnyı» eldi mekeninde – 100%, Qabanbaı batyr dańǵylynan áýejaıǵa qaraı – 100%, «Talısman» TK aýdanynda – 100% oryndaldy.

Bıyl qalanyń tsıfrlandyrý jáne memlekettik qyzmetter basqarmasymen birlesip, ruqsat etilmegen qoqys úıindileri jınalatyn oryndarda táýlik boıy monıtorıng júrgizý úshin jalpy beınebaqylaý beınekameralaryn ornatý josparlanyp otyr.

Qazirgi ýaqytta Saryarqa aýdanynda 16 oryn boıynsha 14 myń tonnadan astam qoqys joıyldy.

Kún saıyn ekologııalyq polıtsııamen birlesip monıtorıng júrgiziledi.

Sonymen qatar, bul máselede turǵyndar, áleýmettik jelilerdegi suranystar men «Ǵarysh Sapary» sýretteri septigin tıgizedi.