Astanada «Jyl basy - Naýryz» merekelik sharasy ótpek

ASTANA. QazAqparat - 22 naýryz kúni Astana qalasy Esil aýdanyndaǵy «Atameken» Qazaqstan Kartasy» etno-memorıaldyq kesheniniń alańynda «Jyl basy - Naýryz» atty merekelik is-shara ótedi, dep habarlaıdy sharanyń uıymdastyrý alqasy.

Іs-shara barysynda teatrlandyrylǵan kórinister, merekelik qoıylymdar, óner maıtalmandarynyń daıyndaǵan kontserttik baǵdarlamasy, ata-babadan jetken halqymyzdyń joralǵylary men dástúrlerin dáripteý sharalary, qolóner kórmesi jáne ulttyq sporttyq oıyndar ótkiziledi.

Naýryzdy tamashalaýǵa kelgen qonaqtar ulttyq oıyndarda baq synasyp, ár túrli baıqaýlarǵa qatysa alady. Atap aıtar bolsaq, «Naýryzym - nurly yrysym» naýryz kójeler baıqaýy, «Jarqyraǵan jas nurly, Jasa, Naýryz dástúrli» atty eń tátti samaýryn shaıy, «Kıim piri - kımeshek» ulttyq kıimdi naqyshtaıtyn ájeler baıqaýy, «Burymdy qyz» baıqaýy, «Tórlet, áz - Naýryz!» jas aıtysker-aqyndar saıysy, «As atasy - nan» atty eń tátti baýyrsaqtar saıysy, «Atalar sózi - aqyldyń kózi» mektep oqýshylary arasynda maqal-mátelder jarysy, úı sharýalaryna pysyq jas kelinder baıqaýy jáne t.b. taqyryptarda qyzyqty saıystar uıymdastyrylady.

Baıqaý jeńimpazdary túrli syılyqtar men marapattaýlarǵa ıe bolady.