Astanada jýrnalıster alleıasy ashyldy
Alleıada baspa salasy qyzmetkerleriniń qurmetine arnaıy músinder ornatylǵan.
Saltanatty sharada sóz alǵan Aqparat jáne qoǵamdyq damý mınıstri Darhan Qydyráli búgin otandyq jýrnalıstıka úshin tarıhı sát ekenin atap ótti.
«Búgin qazaq jýrnalıstıkasy úshin tarıhı sát boldy deýge bolady. Osydan dál eki jyl buryn Memleket basshysynyń qatysýymen Alash qaıratkerleriniń eskertkishi ashyldy. Qalamgerler alleıasymen jalǵasyp jatqan jýrnalıster saıabaǵy ulttyq rýhanııattyń sabaqtastyǵyn kórsetedi.
Qazaq ulttyq baspasóziniń baǵdary bolǵan Ahmet Baıtursynuly men táýelsiz qazaq basylymdarynyń bahadúri Sheraǵańnyń beınesi qatar ornalasqan. Barlyq basylymdar men medıa aty jýrnalıstıkanyń jylnamasy dep baǵalaýǵa bolady.
Taıaýda ǵana Prezıdenttiń qamqorlyǵymen 2 aqpan - Ulttyq basylym kúni bolyp belgilendi. Bul da bir sabaqtastyqtyń jarqyn kórinisi», - dep toqtaldy mınıstr.
Shahar basshysy Jeńis Qasymbek «Jýrnalıster alleıasy» qala turǵyndarynyń jıi serýen quratyn súıikti ornyna aınalady dep senim bildirdi.
«Barshańyzdy kele jatqan Elorda kúnimen, al jýrnalısterdi ótken kásibı merekesimen quttyqtaımyn! 25 jyl ishinde elorda ákimshilik ortalyqqa ǵana emes, mádenıet, shyǵarmashylyq jáne rýhanııat ortalyǵyna aınaldy. Búgingi tańda iri basylymdar men BAQ keńseleri bizdiń qalamyzda ornalasqan. Osyǵan baılanysty mundaı alleıanyń elordada paıda bolýy oryndy dep sanaımyn. Jýrnalıstıka - úlken jaýapkershilikti talap etetin jáne qoǵamnyń damýyna eleýli úles qosatyn biregeı mamandyq. Kún saıyn bizge ózekti taqyryptar men mańyzdy aqparattardy jetkizetin mamandardyń jumysyn erekshe atap ótkim keledi. Jýrnalıster alleıasy qala turǵyndarynyń súıikti ornyna aınalady dep senemin», - dedi Astana qalasynyń ákimi Jeńis Qasymbek.