Astanada júk poıyzynyń temirjol tsısternasynan kúkirt qyshqyly tógilgen

<p>ASTANA. KAZINFORM &ndash; Kóliktegi sanıtarııalyq-epıdemıologııalyq baqylaý departamenti 2024 jylǵy 10 qyrkúıekte Astana stantsııasynyń stantsııalyq dıspetcherinen júk poıyzynyń temirjol tsısternasynan kúkirt qyshqylynyń tógilgeni týraly aqparat túskenin habarlady.</p>

Málim bolǵandaı, Chelıabınsk qalasynan Jańatas qalasyn baǵyt alǵan júk tasymaldaýshy tsısternalar Astana qalasyndaǵy Astana stantsııasynyń pred-gorochnyı parkiniń 2-shi jolynda toqtaǵan kezde, temirjol qyzmetkerleri tekserý júrgizý barysynda tsısternada jaryq paıda bolyp, kúkirt qyshqylynyń tógilgenin anyqtady.

«Departamenttiń jáne Astana qalasyndaǵy «Ulttyq saraptama ortalyǵy» ShJQ RMK fılıalynyń mamandary oqıǵa ornyna shuǵyl túrde kelip, kúkirt qyshqylynyń tógilý faktisine baılanysty atmosferalyq aýa synamalaryn aldy. Zertteý nátıjeleri boıynsha, aýadaǵy zııandy zattardyń deńgeıi shekti ruqsat etilgen mólsherden aspaǵany anyqtaldy», - delingen habarlamada.

Qazirgi ýaqytta kúkirt qyshqylynyń aǵýy toqtatyldy, zardap shekkender men qaza tapqandar joq.

Kúkirt qyshqylynyń qaýiptiligi týraly

Kúkirt qyshqyly – hımııalyq turǵydan óte belsendi jáne qaýipti zattardyń biri. Ol terige, shyryshty qabattarǵa jáne tynys alý júıesine qatty titirkendirý áserin tıgizýi múmkin. Kúkirt qyshqylynyń býlary men aerozolderimen uzaq ýaqyt baılanys bolǵan jaǵdaıda:

• Júıke júıesine zııan kelýi múmkin;
• Ókpeniń isinýi jáne tynys alý joldarynyń kúıip qalýy múmkin;
• Kózdiń zaqymdalýy, sonyń ishinde kórý qabiletiniń joǵalýyna ákelýi múmkin;
• Teriniń hımııalyq kúıikteri paıda bolady.

Sondyqtan kúkirt qyshqylymen baılanysqa túsken kezde qaýipsizdik sharalaryn saqtaý jáne zardap shekken aımaqtardy dereý sýyq sýmen shaıý qajet.