Astanada JRVI-diń taralýy 30% asqan jaǵdaıda mektep jumysy toqtatylady

ASTANA. QazAqparat – Elordada JRVI juqtyrǵandardyń 6 paıyzy - sábıler jáne 5 paıyzy - júkti áıelder. Bul týraly qala ákimdiginde ótken baspasóz máslıhatynda aıtyldy, dep habarlaıdy QazAqparat tilshisi.

«Astanada 1 qazannan bastap JRVI-diń taralýy boıynsha 42 022 jaǵdaı tirkeldi. Odan bólek, tumaýdyń taralýy bar. Sońǵy aptada JRVI men tumaýdyń taralýynda sál ósim baıqalady. Jas erekshelikterine kelsek, syrqattanýshylardyń 54% 14 jasqa deıingi balalar men jasóspirimder. Onyń 6 paıyzyn 1 jasqa deıingi sábıler quraıdy. Sonymen qatar júkti áıelder arasynda JRVI men tumaýdyń taralýy 5% jetti», - dedi Astana qalasy qoǵamdyq densaýlyq saqtaý basqarmasy basshysynyń orynbasary Berik Qaıkenov brıfıngte.

Onyń aıtýynsha, JRVI juqtyrǵandardyń 5% statsıonarlyq jaǵdaıda emdeldi. Sondaı-aq ol mektepter jumysy qandaı jaǵdaıda toqtatylatynyn aıtty.

«Eger JRVI-ge bir synypta oqýshylardyń 20-30 paıyzy shaldyqsa, synypta oqý ýaqytsha toqtatylady. Al synyp oqýshylarynyń indetti juqtyrý kórsetkishi 30 paıyzdan asyp ketse, ondaı jaǵdaıda mekteptiń jumysy ýaqytsha toqtatylady», - dep túsindirdi Astana qalasy sanıtarlyq-epıdemıologııalyq baqylaý departamenti basshysynyń orynbasary Janna Pralıeva.