Astanada jol-kólik ınfraqurylymyna qajetti 1 myń jer ýchaskesi satyp alynbaq

ASTANA. QazAqparat - Elordada jol-kólik ınfraqurylymyna qajetti jer ýchaskelerin satyp alýǵa 18 mlrd teńge bólinbek. Bul týraly búgin Úkimet otyrysynda elordanyń 2019-2023 jyldarǵa arnalǵan jınaqy qurylysy jónindegi keshendi josparyna oraı baıandama jasaǵan QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat tilshisi.

«Jol-kóliktik ınfraqurylym máseleleri boıynsha keshendi jospar aıasynda jalpy uzyndyǵy 200 shaqyrym bolatyn 102 jobany iske asyrý jáne osy maqsattarǵa 1000-ǵa jýyq jer ýchaskesin alý josparlanýda. Respýblıkalyq bıýdjetten qajet qarjy  2023 jylǵa deıin  276 mlrd teńgeni quraıdy, onyń ishinde 2019 jylǵa 70,4 mlrd teńge qajet. Onyń ishinde qurylystyq-montajdyq jumystarǵa 52,4 mlrd teńge, jer ýchaskelerin satyp alýǵa 18,0 mlrd teńge kózdelgen», - dedi Jeńis Qasymbek.

Sonymen qatar onyń aıtýynsha, Astana qalasynyń №1 ındýstrıaldy parki boıynsha mınıstrlik jobalyq-smetalyq qujattamanyń jáne memlekettik saraptamanyń qorytyndysy bolǵan jaǵdaıda qarjylandyrý máselesin qoldaıdy. Qolda bar qujattamalardy esepke ala otyryp, ótinish berilgen 3,7 mlrd  teńgeniń 700 mln teńgesi qoldaý tapty.

«№2 ındýstrıaldy park boıynsha jalpy somasy 143,7 mlrd teńgeni quraıdy. Keshendi jospar aıasynda 2019-2023 jyldarǵa 20,7 mlrd teńge qarjy kózdelgen. Qazirgi ýaqytta Astana qalasynyń ákimdigi jobalyq-smetalyq qujattamany ázirleýde», - dedi ol.