Astanada joǵary oqý oryndarynyń úzdik oqytýshylary 6 mln teńgeden syıaqy aldy
Marapattardy QR Ǵylym jáne joǵary bilim mınıstri Saıasat Nurbek tabystady, dep habarlaıdy QazAqparat mınıstrliktiń baspasóz qyzmetine silteme jasap.
Baspasóz qyzmetiniń málimetterine qaraǵanda, baıqaýda elimizdegi 43 joǵary oqý ornynyń 150 oqytýshysy jeńimpaz atandy. Olardyń árqaısysy 2000 AEK (6 mln 126 myń teńge) syıaqy aldy. Oqytýshylarǵa qarjylaı yntalandyrýmen qatar tósbelgi de tabystaldy.
«Biz úshin oqytýshylardy yntalandyrý jáne mamandyqtyń bedelin arttyrý mańyzdy. Búgin biz zalda elimizdiń joǵary oqý oryndarynyń úzdik oqytýshylaryn jınadyq. Mınıstrlik atynan Sizderge tańdaǵan isterińizge adaldyqtaryńyz jáne joǵary kásibı biliktilikterińiz úshin alǵys aıtamyn. Aldymyzda turǵan negizgi basymdyqtardyń biri – zertteý ekojúıesin qalyptastyrý jáne ǵylymı áleýetti arttyrý. Sondaı-aq, joǵary oqý oryndaryn tsıfrlyq joǵary oqý oryndaryna transformatsııalaý qajettigin atap ótý qajet. Qurmetti áriptester, munyń bári sizderdiń eńbekterińizdiń arqasynda ǵana múmkin bolmaq!», – dedi saltanatty jıyndaǵy sózinde mınıstr Saıasat Nurbek.
Іs-sharaǵa qonaq retinde qatysqan QR Parlamenti Senatynyń depýtaty Nurtóre Júsip te oqytýshylardy quttyqtady.
«Myqty tulǵalardy, jas akademık-ǵalymdardy ósirip shyǵarý – sizderge júktelgen mindet. Osy salada tabys tileımin, densaýlyqtaryńyz myqty bolsyn. Bul marapat sizderdiń izdenisterińizge, múmkindikterińizge sebep bolady dep oılaımyz. Osyndaı is-sharany uıymdastyryp otyrǵan Ǵylym jáne joǵary bilim mınıstrligine, Qazaqstannyń túpkir-túpkirinen kelip otyrǵan ustazdar qaýymyna alǵys aıtamyn», - dedi senator.
Aıta keteıik, «Joǵary oqý ornynyń úzdik oqytýshysy – 2022» baıqaýyna elimizdiń 71 oqý ornynan barlyǵy 775 úmitker qatysty. Respýblıkalyq konkýrstyq komıssııanyń sheshimimen saıysta elektrondy oqý resýrstaryn, oqý materıaldaryn ázirleý jáne jarııalaý, otandyq jáne halyqaralyq jýrnaldardaǵy ǵylymı jarııalanymdar, ónertabysqa patentterdiń bolýy jáne t.b. sııaqty kórsetkishter baǵalandy. Sondaı-aq, úmitkerdiń oqytý sapasy, onyń bakalavrıatta, magıstratýrada jáne doktorantýrada kadrlar daıarlaý qyzmetindegi eńbegi baǵalandy.