Astanada joǵary oqý oryndary basshylaryn oqytý bastaldy

ASTANA. QazAqparat - Astanada Qazaqstannyń joǵary oqý oryndarynyń basshylaryna arnalǵan Academic Leadership Institute baǵdarlamasynyń 6-shy oqytý modýli bastaldy, dep habarlaıdy QazAqparat QR Ǵylym jáne joǵary bilim mınıstrliginiń baspasóz qyzmetine silteme jasap.

Jobany Qazaqstan Respýblıkasy Ǵylym jáne joǵary bilim mınıstrliginiń bastamasymen Nazarbaev Ýnıversıtetiniń Joǵary bilim berý mektebi ázirledi.

2023 jyldyń sáýir aıynda bastalǵan Academic Leadership Institute baǵdarlamasy bilim berýdi transformatsııalaý jáne búgingi dınamıkalyq orta jaǵdaıynda joǵary oqý oryndary ákimshiliginiń kóshbasshylyq daǵdylaryn qalyptastyrýǵa jáne quzyretterin arttyrýǵa baǵyttalǵan.

Baǵdarlamaǵa qatysýshylardyń aldynda Ǵylym jáne joǵary bilim mınıstrligi Apparatynyń basshysy Bolat Tókejanov quttyqtaý sóz sóıledi.

Óz sózinde ol «Akademııalyq kóshbasshylyq ınstıtýty» kýrsy qamtıtyn aspektilerdiń árqaısysynyń mańyzdylyǵyn atap ótti. Olardyń arasynda turaqtylyq, basqarý, uıymdastyrýshylyq ózgerister jáne talanttardy basqarý bar.

«Osy salalardaǵy quzyrettilikti arttyrý óz bilim berý uıymdarynda mańyzdy ózgeristerge bastamashy bola alatyn kóshbasshylardy qurýǵa baǵyttalǵan», – dep atap ótti Bolat Tókejanov.

Sondaı-aq, baǵdarlama tyńdaýshylarynyń aldynda mınıstrlik apparatynyń basshysy josparlaý, bıýdjetteý jáne boljaý taqyrybynda dáris oqydy.

Jalpy, «Academic Leadership Institute» baǵdarlamasy 9 modýlden turady, olardyń árqaısysy ýnıversıtettegi belgili bir transformatsııa protsesterin qamtıdy. Mysaly, joǵary oqý oryndarynyń qundylyq baǵdarlary jáne olardyń qoǵam úshin mańyzy, kóshbasshylyq, ýnıversıtet qurylymyn qaıta qaraý, stýdenttik máselelerdi sheshý jáne akademııalyq baǵdarlamalardyń sapasyn qamtamasyz etý.

6-shy «Uıymdastyrýshylyq ózgerister» modýlinde tyńdaýshylar kóshbasshylyq strategııalardy, marketıng, brendıng, PR jáne tsıfrlyq marketıngti qosa alǵanda, ózgeristerdi basqarýdyń negizgi aspektilerin zerttedi.

Modýldiń ekinshi kúni josparlaý, bıýdjetteý, boljaý, múlikti basqarý jáne táýekelder sııaqty uıymdyq ózgeristerdiń qarjylyq aspektilerine arnaldy.

Kýrs sheńberinde qatysýshylar mınıstrlikter ókilderiniń, QR Parlamenti depýtattarynyń, joǵary bilim salasyndaǵy ulttyq jáne halyqaralyq sarapshylardyń dáristerin tyńdaıdy, toptar boıynsha jumys isteıdi, praktıkalyq mindetterdi sheshedi jáne tájirıbelerimen bólisedi.