Astanada alǵash ret jeńil atletıkadan álemdik jarys ótedi

<p>Astanada World Athletics Indoor Tour Gold Label jeńil atletıka jarysy ótedi. Bul jarys Olımpıada oıyndary men álem chempıonattaryna qatysý úshin upaı jınaýǵa múmkindik beredi, dep habarlaıdy <a href="https://kaz.inform.kz/search_results/?q=%D0%B6%D0%B5%D2%A3%D1%96%D0%BB+%D0%B0%D1%82%D0%BB%D0%B5%D1%82%D0%B8%D0%BA%D0%B0" target="_blank" rel="noopener">QazAqparat</a> tilshisi.&nbsp;</p>

World Athletics Indoor Tour – 2016 jyldan beri ótip kele jatqan jabyq jeńil atletıka jarystary. Bul serııa «Gaýhar lıgasy» úlgisinde jeńil atletıkalyq jabyq jarystardyń bedelin arttyrý maqsatynda jasalǵan. 2021 jyly World Athletics osy jarystardyń altyn, kúmis jáne qola deńgeıin usyndy. Olar jarysty uıymdastyrý deńgeıimen jáne júlde qorymen erekshelenedi.

Bıyl Astanada alǵash ret World Athletics Indoor Tour Silver Level jarysy ótken edi. 2024 jyly Astana altyn deńgeıdegi jarystardy ótkizedi. Osylaısha, elorda Olımpıada maýsymyn ashpaq. Astanadan keıin bul jarystar Boston, AQSh (3 aqpan, 2024), Torýn, Polsha (6 aqpan, 2024), Leven, Frantsııa (10 aqpan, 2024), Nıý-Iork, AQSh (11 aqpan, 2024), Madrıd, Ispanııa (22 aqpan, 2024), Bırmıngem, Ulybrıtanııa (24 aqpan, 2024) qalalarynda jalǵasyn tabady.

World Athletics Indoor Tour Gold Label – sportshylarǵa Olımpıada oıyndary men álem chempıonattaryna qatysý úshin upaı jınaýǵa múmkindik beretin bir kúndik reıtıngtik jarys. Upaılar ár baǵyt boıynsha tórt úzdik sportshyǵa beriledi.

QR Jeńil atletıka federatsııasynyń atqarýshy dırektory Pavel Kýkınniń aıtýynsha, Astanadaǵy týrnır 2024 jyldyń 27 qańtaryna josparlanǵan.

«Qazaqstan 2024 jyly INDOOR tour Gold LEVEL serııasynyń jarystaryn qabyldaýǵa daıyn. Astana meet for prizes of Amin Tuyakov týrnıri otandyq jeńil atletıkanyń jańa tarıhyn ashady. Qazaqstandyq sportshylar álemdegi eń myqty sportshylarmen birge júgirý jolaǵyna shyǵady. Týrnırdiń júlde qory 100 000 dollarǵa jetedi. Jarys jeńil atletıkanyń 12 túri boıynsha ótedi. Qorytyndy nátıjeler qazaqstandyq sportshylarǵa 2024 jyly Parıjde ótetin Olımpıada oıyndaryna lıtsenzııa alýǵa múmkindik beredi», - dedi P.Kýkın Ortalyq kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, mundaı deńgeıdegi jarystardy ótkizý qazaqstandyq jelaıaqtardyń áleýetin paıdalanýǵa, halyqtyń jeńil atletıkaǵa qyzyǵýshylyǵyn arttyrýǵa kómektesedi.

«Sońǵy 4 jylda qazaqstandyq sportshylar 60-tan astam rekord ornatty. Bul oń nátıjeni kórsetedi, ulttyq chempıonattarǵa qatysatyn sportshylar sany 30%-ǵa ósti. Osy faktilerdiń barlyǵy Qazaqstan jeńil atletıkasyn damytý jolynyń tıimdiligin kórsetedi», - dedi Pavel Kýkın.