Astanada Jeńis kúni jáne Otan qorǵaýshylar merekelerine arnalǵan qaıyrymdylyq kontsert bolady

ASTANA. 21 sáýir. QazAqparat - Aldaǵy 7 mamyrda Kongress-Holl saraıynda Astana qalasy Memlekettik fılarmonııasynyń uıymdastyrýymen Jeńis kúni jáne Otan qorǵaýshylar merekelerine arnalǵan «Lenıngradtyq órenderim!» atty qaıyrymdylyq kontserti ótedi.

Kontsert baǵdarlamasynda: sımfonııalyq orkestrdiń oryndaýyndaǵy D.Shostakovıchtiń «№7 Lenıngradtyq sımfonııasynyń 1 bólimi», QR Eńbek sińirgen ártisi Ǵalııa Baıǵazınova, QR Mádenıet qaıratkeri Qııaqbaı Asambaev, halyqaralyq baıqaýlardyń laýreattary Azamat Jyltyrkózov, Tatıana Hasıanova, Bıbigúl Januzaq, Tatıana Vıtsınskaıa, Bátıma Izenaevanyń soǵys taqyrybyna arnalǵan ánderi bar.

D.Shostakovıchtiń «№7 Lenıngradtyq sımfonııasy» Uly Otan soǵysy kezeńiniń kórnekti týyndylarynyń biri. «1941 jylǵy surapyl soǵys kórinisteri sımfonııamnyń dúnıege kelýine túrtki boldy», - dep aǵynan jarylady avtor.

Shostakovıchtiń jetinshi sımfonııasy soǵys jaıly baıandaıtyn derekti shyǵarma ispetti, onda ómirge qushtar, zulymdyqqa jany qas halyqtyń rýhy seziledi, sondyqtan bolar jetinshi sımfonııa «jylnama» dep te atalady. Alǵash ret bul ǵajaıyp týyndyny 1942 jyldyń 9 tamyzynda nemis áskeriniń qorshaýynda qalǵan lenıngradtyqtar tyńdady. Uly týyndy halyqtyń boıyndaǵy jankeshtilik, Otanǵa degen súıispenshilik sezimderin qaırap, jeńiske degen senimin nyǵaıtty.